Vllaznia mbetet pa Administrator, Naku jep dorëheqjen: Sponsori nuk ka kompetencat e presidentit

0

Punët në fushën e lojës po shkojnë në mënyrën më të mirë të mundshme për klubin e Vllaznisë, që në 3 javët e para në kampionat numëron po aq fitore, duke shfaqur një formë për t’u duartrokitur. Por në kupolën drejtuese nuk mund të thuhet e njëjta gjë, teksa ka sërish ndryshime në postin e Administratorit të klubit. Suad Lici la këtë post për t’i hapur rrugnë Benjamin Nakut, i cili tashmë ka dhënë dorëheqjen e tij të parevokueshme.

Naku njofton largimin e tij nga ky post i klubit të Vlllaznisë mbrëmjen e djeshme, pas triumfit spektakolar kudnër Tiranës. Dorëheqja është dhënë më parë, por vetë ish-administratori ka zjgedhur ta bëjë publike tashmë, në mënyrë që të mos prishë atmosferën në skuadër.

Shkak për këtë largim të tijin duket se është bërë marrëdhënia mes tij dhe sponsorit Xhaferi, me të cilin pati edhe një konflikt pak kohë më parë. në media u përfol se Xhaferi nuk u lejua të futej në stadium nga Naku, për shkak se nuk kishte emrin në listë, megjithëse kjo histori u hodh poshtë nga administratori Vllaznisë. Ndërkohë Benjamin Naku njofton se sponsori i kuqebluve nuk e ka kompetencën për të bërë presidentin e klubit dhe se sipas tij Alban Xhaferi ka marrë më tepër hapësira reklamimi se sa vlera që ka derdhur në arkat e Vllaznisë.

“E kam pranuar me shumë dëshirë detyrën e Administratorit të Klubit të Futbollit “Vllaznia” sh.a., duke e ndjerë veten të nderuar, por edhe duke ndjerë përgjegjësinë që të jap kontributin tim në funksionimin e përditshëm të Klubit të dashur për të gjithë ne.

Megjithë detyrimet e tjera profesionale, si pjesë e Këshillit Mbikqyrës të mëparshëm, kam qënë në dijeni të vazhdueshme të problematikave të Klubit dhe jam munduar të jap kontributin tim modest në funksionimin e rregullt të tij.

Situata e krijuar së fundmi si dhe deklarimet e Sponsorit të Klubit, z Alban Xhaferi, dua të sqaroj opinionin për sa më poshtë.

1.Struktura ligjore e KF Vllaznia, si shoqëri tregtare me objekt sportiv, funksionon bazuar në Ligjin nr. 9901, datë 14.04.2008, i ndryshuar. Ky ligj përcakton si drejtues të tij vetëm Këshillin Mbikqyrës dhe Administratorin. Duke respektuar maksimalisht kontributin e z.Xhaferi, ai mbetet nje sponsorizues i aktivitetit sportiv të KF “Vllaznia” dhe në asnjë mënyrë nuk mund t’i jepen kompetenca të “presidentit” apo administratorit, sepse ligji nuk e lejon një gjë të tillë. Përgjegjësia ligjore, administrative dhe drejtuese mbetet vetëm e administratorit dhe e strukturave të miratuara nga ai dhe Këshilli Mbikqyrës.

2.Lidhur me Marrëveshjen Kuadër “Për Sponsorizim, Bashkëpunim dhe Partneritet në fushën e sportit”, që është firmosur nga Bashkia Shkodër me z.Xhaferi, si përfaqësues i ALBAPHOTO shpk – distributor i autorizuar i FUJIFILM, ajo nuk mund të zëvendësojë bazën ligjore të funksionimit të një shoqërie tregtare me kapital 100% publik, siç është KF “Vllaznia” sh.a. dhe aq më pak, ta kundërshtojë atë, sepse do të bënte të pavlefshme juridikisht zbatimin e saj dhe vendimeve të marra bazuar në të.

3.Dua të sqaroj opinionin shkodran se në projekt-buxhetin e vitit 2021 për KF “Vllaznia” sh.a., Bashkia planifikon një mbështetje prej 60 milion lekësh, ndërsa Sponsori 20 milion lekë. Ndërsa gjatë vitit 2020, deri në momentin e këtij njoftimi, Bashkia Shkodër e ka mbështetur KF “Vllaznia” me një buxhet prej 44 milion lekësh, ndërsa Sponsori ka dhënë 3 milion lekë. Ndërkohë, Sponsori ka vendosur emrin e vet ne kostumet sportive të ekipit të parë dhe të Akademise, si dhe ka marrë në përdorim gjithë hapësirat e reklamës në stadium, që vlejnë shumë më tepër se sa kontributi i tij financiar.

4.KF Vllaznia po hyn në proçes ligjor privatizimi dhe në këto kushte, duhet që të krijohen hapësira të barabarta ligjore për të gjithë të interesuarit dhe duhet ndjekur një proçedurë e saktë që eleminon ankimimet eventuale nesër për parregullsi ligjore.

I gjendur përballë kësaj situate që me datë 17.11.2020 i kam paraqitur dorëheqjen time te parevokueshme Këshillit Mbikqyrës të KF ”Vllaznia”. Arsyeja që sot bëhet publike është që të ruhej klima dhe përqëndrimi i ekipit tek ndeshja e sotme me ekipin e ”Tiranës”. I lumtur në maksimum, ashtu si çdo shkodran tjetër, e kam shijuar fitoren e sotme ndaj Tiranës. Largimi im nuk do të thotë se largohem nga Vllaznia. Me mendje e zemër do jem gjithnjë pranë saj, për ta mbështetur e suportuar si në raste gëzimesh, por edhe kur ajo të jetë në momente të vështira. Motoja ime e jetës sportive por edhe më pas ka qenë gjithmonë: ”Unë s’kam zemër, unë kam Vllazni”! Dhe kështu, do të jetë përgjithmonë…

Në përfundim dua të falenderoj të gjithë bashkëpuntorët pjesë e strukturës së KF “Vllaznia” të cilët me  përkushtimin e tyre (megjithëse kanë 6 muaj pa marrë rrogat) krijojnë kushtet e nevojshme për mirëfunksionimin e klubit”, njofton Benjamin Naku./Halit Delibashi-Sport Ekspres/

 

You might also like

Leave A Reply

Your email address will not be published.