Emir Sahiti po rilind në radhët e Sibenikut. Dikur pjesë e Hajdukut të Splitit, ku i besohej vetëm një vend në ekipin e dytë, tashmë një protagonist në elitën e futbollit kroat. “Hakmarrja“ erdhi pikërisht ndaj ish-skuadrës me golin e tij të parë në kampionatin kroat, ndërsa pas atij goli ka arritur të ruajë formën mjaft pozitive me Sibenik.
Pas dopietës në takimin e fundit, një tjetër rrjetë e tundur shtohet në statistikat e Emir Sahitit këtë sezon. Sulmuesi 22-vjeçar ka shtangur kampionët në fuqi me një gjuajtje nga larg në pjesën e parë të lojës, duke zhbllokuar kështu rezultatin.
Dinamo e Zagrebit do të barazonte shifrat pak minuta më vonë, por kjo nuk do i çonte në rrugën e fitores. Në minutën e 65 lojtari shqiptar bëhet sërish protagonist. Këtë herë jo duke shënuar, por duke dhuruar asistin për golin e Juriç që do të vuloste fatin përfundimtar të ndeshjes./Halit Delibashi-Sport Ekspres/