Është mbyllur mes emocioneve përballja mes Vllaznisë dhe Egnatias. Shkodranët kanë barazuar në sekondat e fundit të ndeshjes, duke mbajtur gjallë shpresat për një kualifikim në finalen e Kupës së Shqipërisë. Duamena heshti “Loro Boriçin” në minutën e 68, kur pasi dribloi edhe portierin, e ndali topin në rrjetë.
Rrogozhinasit arritën të administronin me sukses avantazhin për pjesën e mbetur të ndeshjes, por kur pritej vërshëllima e trefishtë e arbitrit, Hoxhaj e shtyn topin në rrjetë. Një gol në sekondat e fundit që shpëton Vllazninë nga humbja dhe pritet ta bëjë më të fortë garën në ndeshjen e kthimit./Halit Delibashi-Sport Ekspres/