Ndodh ajo që tifozët shqiptarë më pak prisnin. Andorra shtang Kosovën në “Fadil Vokrri”, duke rrëmbyer një pikë. Skuadrat janë ndarë me një barazim 1-1. Një barazim që për Andorrën festohet si të ishte një fitore, por për dardanët shijon si një humbje. Kosova dominoi ndeshjen nga minuta e parë në vërshëllimën e trefishtë të gjyqtarit, teksa statistikat flasin të gjitha në favor të tyre.
Por megjithëse me statistikat nga pas dhe me kualitete dukshëm superiore në fushë, sërish përfaqësuesja e Kosovës nuk arrin të marrë tre pikët kundër një ekipi si Andorra, e cila është edhe Kombëtarja me të cilën kurrsesi nuk mund të hidhen hapa fals.
Ndeshja u zhbllokua në minutën e 59, kur Edon Zhegrova e dërgoi topin pas shpinës së portierit, por vetëm 2 minuta më vonë Rosas tundi rrjetën dhe i dha një pikë të vyer Andorrës. Një rezultat që do të rëndojë shumë mbi supet e lojtarëve dardanë, teksa shanset për një kualifikim të mundshëm zbehen ndjeshëm, duke ditur se në grup gjenden Kombëtare si Zvicra, Rumania dhe Izraeli./Halit Delibashi-Sport Ekspres/