Reali i Madridit hodhi në kosh miliardat e PSG-së në vetëm 90 minuta, duke i eliminuar nga Liga e Kampionëve. Humbja në “Santiago Bernabeu“ nuk u prit mirë në kampin parisien, ku në media u raportua edhe për një konfrontim fizik mes Nejmarit dhe Donarumës.
Por këto pretendime hidhen poshtë nga vetë braziliani, i cili ka shpërndarë një foto nga biseda me portierin italian, në të cilën dallohet se raportet mes tyre janë mjaft të mira. Gjithashtu, Nejmar ka përdorur “Instagramin“ për të kritikuar gazetarët për lajmin që sipas tij është i pavërtetë.
“E urrej që të dal këtu për të folur për lajme të caktuara… Por ai në postimin e mëparshëm (ai tregon lajmet në anglisht dhe portugalisht për diskutimin e tyre të supozuar) është një gënjeshtër. Brenda dhomave të zhveshjes nuk ka pasur asnjë përleshje. Gazetarë të paaftë që kërkojnë të lulëzojnë. Provojeni herën tjetër, në rregull?”, shkruan Nejmari./Sport Ekspres/
