Miqësorja e dytë për Tiranën, fitorja e dytë. Përballë bardhebluve këtë herë ishte Flamurtari i Prishtinës dhe në fund skuadra kryeqytetase triumfoi me rezultatin 3-0. Sentamu, Kobinah dhe Turtulli ishin autorët e golave dhe kryeqytetasit realizuan sikurse me Apoloninë në pjesën e dytë.
Trajneri Ze Maria kishte bërë ndryshime në krahasim me ndeshjen ndaj Apolonisë. Sentamu, i cili mbërriti në kryeqytet të mërkurën, ishte nga minuta e parë në fushën e blertë. Hasani ishte përzgjedhur gjithashtu titullar, kurse Daja e Karabeci ishin në stol. Cake kishte zënë vendin e Turtullit dhe Kërçiku të Dokës. Edhe në portë ishte pozicionuar Abibi.
Pjesa e parë ishte e luftuar, por me Tiranën më kërkuese. Gjithsesi mungoi pasi i fundit në të shumtën e kohës, ndërkohë që goditjet e Sentamu dhe Blazhevskit nuk kishin shënjestrën e duhur. Kështu fraksioni i parë i lojës u mbyll në barazim pa gola.
Lëvizje nga pankina. Lika, Karabeci dhe Turtulli zbritën në fushën e blertë, ndërkohë që dolën Abibi, Cake dhe Greca. Mbrojtësi ishte protagonist në golin e avantazhit, që u shënua nga Sentamu në minutën e 57-të. Pas një krosi në zonë, shtatlarti e dërgoi topin drejt portës me një goditje me kokë dhe sulmuesi nga Uganda e shtyu në rrjetë.
Pak minuta më parë ishte Kobinah që i ishte afruar golit, por portieri mik u bë shpëtimtar. Në të 68′ ganezi nuk u ndal dot dhe me një goditje brenda zonës realizoi golin e dytë. Blazhevski tentoi disa herë të shënonte golin e tretë, por nuk ia doli dot.
Ze Maria bëri disa zëvendësime dhe një prej lojtarëve të aktivizuar ishte edhe Stafa, që me një goditje nga distanca befasoi miqtë nga Prishtina. Topi u devijua nga njëri prej mbrojtësve dhe përfundoi jashtë. Nga goditja e këndit që u fitua erdhi goli i tretë. Këtë herë ishte Turtulli ai që realizoi për Tiranën.
Tirana – Flamurtari P. 3-0
Shënues: Sentamu 57′, Kobinah 68′, Turtulli 87′
Tirana: Abibi, Cake, Atingah, Kërçiku, Imami, Maveje, Kobina, Hasani, Greca, Sentamu, Blazhevsku. Trajner: Ze Maria. U aktivzuan: Lika, Karabeci, Turtulli, Muçi, Daja, Doja, Çelhaka, Ismailitit, Stafa
Flamurtari Prishtinë: Neziri, Maxhuni, Quansah, Dumani, Zeqiri, Bruci, Shabani, Krasniqi, Kabashi, Boshnjaku, Shillova. Trajner: Arsim Thaçi. Të gatshëm: Shehu, Ahmeti, Kaciku, Voca, Ademi, Shala, Dragusha, Hiseni, Ymeri, Mendes.
Gjyqtarë: K. Kola, N. Bregasi, E. Potomi.