Flamurtari ka marrë një humbje turpëruese në transfertën e Bylisit me rezultatin e thellë 5-0. Kjo është humbja e pestë në gjashtë javë kampionat për vlonjatët, që mbajnë vendin e fundit në renditje me vetëm një pikë të grumbulluar.
Menjëherë pas përfundimit të ndeshjes, tifozët e Flamurtarit kanë vërshuar me komente në faqen zyrtare të ekipit në “Facebook”, ku shprehin gjithë zhgënjimin e tyre me paraqitjet aspak dinjitoze të kuqezinjve. Të gjithë bashkohen me mendimin se këto rezultate po bëhen të shpeshta duke ia shtuar dhimbjet çdo javë. Tifozët kërkojnë përmirësimin e rezultateve dhe zgjidhjen e situatës aktuale të klubit, pasi nëse vazhdojnë në këto hapa do të shkojnë drejt rënies nga kategoria.
