“Abissnet Superiore” ka hyrë në sprintin e saj përfundimtar. Gara për një vend në ‘final four’ është bërë më e ashpër se kurrë. Edhe tre javë nga fundi i kampionatit të rregullt, tre ekipe janë në garë për vendin e 4-t në elitën e futbollit shqiptar. Aktualisht në këtë pozicion vijon të mbetet Dinamoja. Këta të fundit janë ndalur një barazim 0-0 nga Laçi, duke marrë vetëm një pikë nga kjo sfidë.
Ndërkaq, Skënderbeu ka marrë sot tre pikët përballë Erzenit. Bardhekuqtë kanë fituar me rezultatin minimal 1-0, në një ndeshje që u vendos që në minutën e 7 nga Janaqi. Me këtë fitore Skënderbeu shkon në kuotën e 47 pikëve, po aq sa Dinamo e vendit të 4-t. Por gara shkon përtej këtyre dy skuadrave, teksa Tirana i ndjek me vetëm një pikë më pak. Bardheblutë luajnë nesër derbin e zjarrtë me Partizanin, ku në rast fitoreje, do të ngjitej në vendin e 4-t në “Abissnet Superiore”. Më poshtë mund të ndiqni intervistat e trajnerëve për emisionin “Skaner Superiore” në “MCN TV”.
Mehmeti (Dinamo): “Në të tilla ndeshje tensioni ndihej. U rritëm goxha në pjesën e dytë, por duhet të jemi të qetë. Kemi problem në 20 metrat e fundit të kundërshtarit, duhet të jemi më të qetë. Kemi shumë forca në zonën e kundërshtarit, krijojmë raste, por të jemi më të qetë. Fitorja vjen jo vetëm në minutën e parë, por edhe në të fundit. Por vjen qetësisht. Lojtarët e ndjejnë presionin e fitores. Tifoz me Partizanin në derbi? Nuk mund të pres nga gabimi i të tjerëve. Ne duhet të kemi më shumë besim te vetja për të shkuar te fitorja. Kur varesh nga të tjerët, nuk është më në dorën tënde. Është një kampionat shumë i çmendur, shumë i vështirë. Duhet të mbledhim forcat për të shkuar te rezultatet pozitive”.
Deliallisi (Erzeni): “Kishim ardhur në Korçë për të dhënë maksimumin e maksimumit tonë. Por e nisëm lojën duke i falur topa kundërshtarit. Kundërshtari në godet me një gjysmë goditje dhe na fiton ndeshjen. Ne krijojmë volum loje, krijojmë raste, por nuk shënojmë. Ana morale, psikologjike, e skuadrës ka rënë, nuk është më e mëparshmja. Është e vështirë, të jemi të sinqertë dhe të mos bëjmë hipokritin. Gjithsecili duhet të marri përgjegjësitë e veta. Edhe unë kam përgjegjësitë e mia, nuk dua të fshihem. Por edhe të tjerët duhet të marrin përgjegjësitë e tyre”.
Cungu (Laçi): “Përtej dëshirës për të marrë 3 pikët, edhe me problematikat me disa mungesa të lojtarëve bazë të formacionit, një pikë i vlen moralit dhe sakrificës së djemve. Ishte mëkat të dilnim pa pikë nga kjo ndeshje. Sa i përket objektivave, kjo pikë nuk na vlen shumë. E kërkonim këtë pikë për të përligjur atë sakrificë të djemve në fushë, por jo për ecurinë dhe objektivat tona. Kam javë që i kërkoj djemve: ‘Duhet të kemi më shumë qetësi në këmbët tona’. Në mendjen tonë për të qenë më saktë. Sidoqoftë, ka momente të mira të ekipit. Por ka momente oshilacionesh që vërehen edhe nga ana juaj. E kemi dëshmuar që kur kemi pasur topin në këmbë kemi bërë gjëra shumë të mira. Mjafton të përmendim vetëm golin ndaj Vllaznisë, që ka qenë një model”./Halit Delibashi-Sport Ekspres/