Ëndrra për një vend në “play off”-et e Kupës së Botërs që nisi në muajin mars përfundon në pak ditë. “Sporteli“ i biletave për në Katar është drejt mbylljes dhe Kombëtarja jonë nuk qendron në radhë për një të tillë. Më 15 nëntor kualifikueset për Kupën e Botës do të jenë një kapitull i mbyllur për Shqipërinë, me shpresën e arritjes së vendit të tretë në grup.
Vetëm një muaj më pas, më 16 dhjetor kuqezinjtë do të mësojnë shortin për edicionin e radhës, atë të Ligës së Kombëve. Ekipi ynë kombëtar gjendet në Ligën B, ku e pret një nivel më i lartë vështirësie nga një edicion më parë kur luantë në një ligë më poshtë. Ndërkohë Liga e Kombeve për sezonin 2022/2023 do të nisë në qershorin e ardhshëm, me ndeshjet e para që do të zhvillohen në datat 2-8 qershor. Kjo do të jetë edhe periudha kur do të mund të shohim sërish kuqezinjtë në fushën e lojës në ndeshje zyrtare./Halit Delibashi-Sport Ekspres/