Granada nuk ka arritur aspak rezultate pozitive në këto ndeshje të fundit në La Liga 2. Por edhe për shkak të formës jo të mirë të kundërshtarëve, ekipi i Myrto Uzunit ndodhet në vendin e dytë që të ngjit në La Liga. Të gjithë kundërshtarët janë aty afër dhe ka jo pak mundësi që Granada të kërkojë ngjitje në elitën e futbollit spanjoll nga faza Play Off. Nëse ndodh ky version, atëherë Silvinjo ka të drejtë që të jetë i alarmuar.
Ndeshjet e Play Off përkojnë me datat e ndeshjeve që do të zhvillojë Shqipëria në kualifikueset e Europianit. Uzuni është shprehur se nuk mendon për Kombëtaren në këtë moment, por vetëm për Granadan dhe La Liga-n. Duke marrë parasysh rëndësinë që ka ky lojtar te Granada dhe kundërshtarët e Shqipërisë, sipas të gjitha gjasave Uzuni do të qëndrojë në Spanjë nëse ekipi i tij nuk ia del të ngjitet në La Liga si njëri nga dy vendet e para të kampionatit. /Sport Ekspres/