Dinamo është rithyer pas shumë vitesh në Kategorinë Superiore dhe tashmë kampionatit i shtohet hijeshia me 12 derbi që do të zënë vend përgjatë gjithë edicionit të ri futbollistik. Por tifozët nuk duhet të presin gjatë për të provuar shijen e derbit të munguar mes Tiranës dhe Dinamos. Të dyja skuadrat e kryeqytetit do të masin forcat me njëra-tjetrën ditën e nesërme.
Tirana dhe Dinamo janë duke zhvilluar parapërgatitjet për sezonin e ri dhe gjatë kësaj faze kanë gjetur edhe momentin për t’u përballur së bashku. Ndeshja do të luhet në stadiumin “Gjorgji Kyçyku“ në Pogradec në orën 17:00. Të gjithë sportdashësit do të kenë mundësinë ta ndjekin derbin e parakohshëm përmes ekranit të “RTSH 1“./Halit Delibashi-Sport Ekspres/