Shkëndija e Tiranës është shpallur kampione e Shqipërisë për të rinjtë, në grupmoshën U-19, teksa ka triumfuar në finale ndaj Vllaznisë me shifrat 2-1.
Një sfidë mjaft emocionuese ajo e zhvilluar në stadiumin “Niko Dovana” në Durrës, ku fillimisht në avantazh kaluan shkodranët, të cilët vinin në këtë takim nën petkun e kampionit. Autor i golit të parë ishte Kulla, i cili çoi në festë të tijtë pas 20 minutash.
Gjithsesi, Shkëndija arriti të reagonte dhe në minutën e 37-të Ajazi vendosi baraspeshën, duke i çuar ekipet në pushim me rezultatin 1-1. Pjesa e dytë nisi me gol, ku ishte dhe një herë tjetër Ajazi, i cili u kthye në hero për Shkëndijen, duke i dhuruar titullin, me sfidën që u mbyll me shifrat 2-1.
KATEGORIA SUPERIORE / U-19
Shkëndija Tiranës – Vllaznia 2-1
Shënues: Ajazi 37′, 51′ / Kulla 20′