Roma u largua me një fitore nga Tirana mbrëmjen e sotme. Verdhekuqtë mposhtën Partizanin me rezultatin 1-2 në miqësoren e zhvilluar në “Air Albania”. Pas përfundimit të ndeshjes, Beloti ka dhënë një intervistë për “RTSH“-në. Sulmuesi i Romës ka vlerësuar ekipin e Partizanit për paraqitjen e bërë përballë tyre, ndërsa sa i përket sezonit të ri në Serinë A, pret një garë të luftuar si në edicionin e shkuar.
“Ishte një ndeshje e luftuar. Kishte lojtarë të mirë. Partizani po luan në Ligën e Konferencës dhe duket që është i përgatitur. Ne e dinim që sidoqoftë, kishim një farë gjendjeje fizike, por jo 100%. Megjithatë, kundër Salernitanës do të jemi gati. Mendoj që ne jemi profesionistë dhe kush hyn në fushë jep gjithçka për Romën. Për sa i përket merkatos, kemi një trajner që punon ditë dhe natë për të plotësuar çdo pjesë që mungon në skuadër. Serie A është një kompeticion shumë i luftuar. E pamë në sezonin e shkuar. Mendoj se edhe këtë vit do të jetë kështu. Ka shumë skuadra të forta. Duhet të bëjmë atë që bëri Napoli sezonin e shkuar, kur iu shkëput të gjithëve. Shpresoj që këtë vit ta bëjmë ne”, ka deklaruar Beloti./Halit Delibashi-Sport Ekspres/