Tirana ka fituar me shifrat 2-0 në takimin ndaj Laçit. Vetë kurbinasit kanë menduar për këtë triumf të bardhebluve me autogolat e tyre. Pjesa e parë kishte pak raste të rrezikshme, teksa veçohet rasti i humbur nga Ismajlgeci. Por mbrojtja hermetike e Laçit u thye në pjesën e dytë. Roganovic do të shënonte autogol pas presionit të Xhixhës në minutën e 53, ndërsa Ignjatovic përsëriti të njëjtën gjë në të 73. Pas kësaj fitore është Tirana që merr kreun e “Abissnet Superiore” dhe Laçi që shkon në vendin e parafundit. Më poshtë gjeni intervistat e trajnerëve për “Supersport”:
Vukicevic: “Nuk e kuptoj sesi luajtëm ashtu me hyrjen në pjesën e dytë, nuk ishim askund, nuk kemi bërë asgjë. Nuk e kuptoj sesi humben disa topa të thjeshtë nga mbrojtësit dhe në mesfushë. E dinim që Seferi, Ngo dhe Xhixha kanë shumë kualitet. Na ka humbur agresiviteti? Nuk e mendoj kështu, kemi reaguar në të gjitha ndeshjet e tjera. Nuk kemi luajtur si grup mirë në këtë ndeshje dhe rivali e gjeti rrugën e rrjetës. Nuk ia japim pasimin lojtarit tonë, por ia japim kundërshtarit. Nuk erdha për të fituar kampionatin me 4 ndeshje, por për të punuar”.