Pas largimit të Silvio Berlusconit, mendohej se kinezët do të ishin shpëtimi i Milanit. Megjithatë Yonghong Li e mbajti klubin kuqezi vetëm për 1 vit, duke e patur të pamundur të kishte në kontroll borxhin financiar.
Në një intervistë për “The Athletic”, drejtuesi sportiv i Milanit, Ivan Gazidis foli për problemet financiare në të cilën ndodhej Milani në periudhën kur fondi Elliott bleu klubin, pasi Yonghong Li nuk respektoi afatin e shlyerjes së borxhit që kishte marrë pikërisht te fondi amerikan.
“Pozicioni financiar ishte i tillë që në fund të fundit duhet të pranonim përjashtimin nga Evropa. Të gjitha paratë që po humbnim ishin kryesisht të lidhura me pagat e lojtarëve dhe tarifat e transferimit, të cilat ishin shumë të larta dhe nuk reflektonin në performancën e ekipit”, u shpreh Gazidis./Elio Hajdari-Sport Ekspres/