Nga Klaudio Ndreca
“Mezi po pres që të punoj me një trajner të madh si Murinjo”! Kjo ishte deklarata e Marash Kumbullës kur Roma zyrtarizoi teknikun portugez, por marrëdhënia mes trajnerit dhe lojtarit nuk po shkon aspak mirë. Nëse nga ana e mbrojtësit shqiptar kishte një dashuri mbi teknikun, madje pa e parë ende dhe vetëm duke dëgjuar për të, nga krahu tjetër ka…”urrejtje”.
Murinjo e injoroi në çdo moment Kumbullën dhe në gabimin e parë që bëri ndaj Bodo Glimt, zgjodhi që ta kryqëzonte. “Këta ishin lojtarët që po kërkonit, nuk luajnë dot as në Serinë B me nivelin e tyre”. Këto fjalë mund të trondisin psikologjikisht të gjithë futbollistët dhe ky moment mund të ndikojë shumë në karrierën e tyre, por Murinjo nuk i mendoi dy herë për t’i thënë në media.
“Ka njerëz me xhepat plot dhe shumë komisione, që pastaj zhduken dhe është klubi që i paguan paratë”. Në mediat italiane është komentuar shumë edhe mbi këto fjalë të trajnerit të Romës, teksa “Il Tempo” shkruan se adresohen të gjitha për transferimin e Marash Kumbullës. Futbolli është shumë kompleks dhe shpeshherë fjalën e parë e kanë menaxherët që vendosin shumë mbi klubet e caktuara, duke përfituar sasinë maksimale të parave.
Ndërkohë Murinjo e cilëson si tërësisht të palogjikshme mënyrën sesi Roma e mori Kumbullën. Në bilanc, mbrojtësi shqiptar u pagua për 28 milionë e gjysmë euro, plus bonusin 1 milionë euro te menaxheri dhe njëkohësisht dërgoi tre lojtarë te Roma si huazim me të drejtë blerje: “Cetin, Cancellieri dhe Diaby”. Pikërisht për këtë arsye Murinjo mendon se klubi ka gabuar rëndë dhe ka shumë humbje të madhe në marrëveshje.
Nëse nga ana teknike e ka refuzuar Kumbullën, nuk mund të heq dot dorë lehtë prej tij dhe është me “duar të lidhura”. Roma e ka të pamundur që të shesë Kumbullën me çmimin e duhur pasi nuk përkon aspak me vlerën e tij reale në treg. Për sa kohë që Murinjo zgjedh që ta mbajë në stol, dëmi i Romës rritet dhe nuk do të përfitonte asgjë nga largimi i mbrojtësit shqiptar. Një shans i dytë i detyruar duket në horizont, por duhet parë sesi do të shkojë kjo marrëdhënie. /Sport Ekspres/