Shqipëria arriti që të barazonte në miqësoren me Arabinë Saudite në shifrat 1-1. Kuqezinjtë shënuan pas kombinimit mes Odise Roshit dhe Bekim Balajt, ndërsa si pjesë e saj ishin shumë futbollistë të Superiores. Nga ana tjetër, Arabia Saudite po përgatitet për Botërorin e Katarit. Mesfushori i saj, Al Maliki, është shprehur se Kombëtarja e tij ka përfituar jo pak nga dy miqësoret e zhvilluara, teksa më herët kishin mundur 1-0 Maqedoninë e Veriut.
“Të përballesh me ekipe si Shqipëria dhe Maqedonia është e vështirë, jo e lehtë. Këto janë Kombëtare të forta dhe ne kemi përfituar shumë prej tyre. Qëllimi ynë kryesor në këto takime ka qenë ngritja e rendimentit fizik dhe jo rezultati”, u shpreh mesfushori. /Elio Hajdari-Sport Ekspres/