Partizani ka arritur që të marrë një tjetër fitore dramatike pas derbit me Tiranën. Të kuqtë gjetën avantazhin kundër Erzenit në pjesën e parë me Tedi Carën. Ky i fundit realizoi një gol fantastik, të një kalibri të lartë. Teksa la pas dy lojtarë rivalë me një lëvizje, Cara gjeti cepin e rrjetës.
Partizanit iu lehtësua puna në minutën e 45, atje ku Kahrimanovic u ndëshkua me karton të kuq. Më pas rezultati i takimit u barazua në minutën e 65 me anë të Mecja. Por kur pritej fundi i takimit, në minutën e 88 ishte Mensah që gjeti golin e fitores, për ta mbyllur rezultatin në 1-2. Pas përfundimit të ndeshjes, trajnerët kanë dhënë intervistat e tyre për emisionin “Skaner Superiore” në “MCN TV”.
Abilaliaj (Partizani): “Është ndeshje shumë e rëndësishme dhe shumë e vështirë. Është kundërshtari i parë që na është mbrojtur me kaq shumë forca në zonë. Arritëm golin e parë me Carën, por mund ta dyfishonim. Nuk është asnjëherë e lehtë kur përballesh në 4 ditë me një skuadër që kryesisht të mëdhave i ka fituar, përveç Egnatias. Edhe Egnatia ka fituar me vështirësi”.
Deliallisi (Erzeni): “Në radhë të parë duhet të falenderoj djemtë për mundin, dhanë më shumë se limiti i tyre. Partizani nuk kishte rrezikshmëri. Pas golit të parë, portiere ynë nuk ka bërë asnjë pritje tjetër. Meritonim diçka më tepër sot për atë që dhamë në fushën e lojës. Nuk na kapën në kundërsulm, ose të na rrezikonin me ndonjë aksion të pastër. Goli i dytë ishte aksidental”./Halit Delibashi-Sport Ekspres/