Vetëm një ndeshje dhe Shqipëria është gati të mësojë fatin përfundimtar në rrugëtimin për në Euro 2021. Sido që të shkojë ky 90 minutësh i fundit, pas vërshëllimës së trefishtë të gjyqtarit edhe nëse nuk do të ketë festë kualifikimi, sërish do të ndezë një ndjenjë krenarie për brezin e artë që po lulëzon në Kombëtare, të cilët luftuan deri në fund gjithçka për gjithçka. Pas fitores së sotme Shpresat e Alban Bushit kanë nisur të bëjnë llogaritë për kualifikimin në Europian dhe kurrë më parë nuk kanë qenë kaq pranë.
Në vendin e 3-të dhe me vetëm 1 pikë më pak se 21-vjeçarët e Austrisë. Në fillim të kualifikueseve diçka e tillë ndoshta nuk do të besohej, por ky ekip theu të gjitha pritshmëritë dhe e shkuan aq lart sa janë gati të prekin ëndrrën e tyre. Por rruga për në Europë kalon nga Anglia, që tashmë i ka “larë hesapet” me kualifikimin dhe ndeshjen me kuqezinjtë e luan më tepër për formalitet.
Ndëkohë në krahun tjetër Austria U21 do të ndeshet me Andorën, e cila gjithashtu ka firmosur vendin e fundit dhe arsyeja e vetme që lufton në fushë është thjesht një fitore prestigji, për ta lënë këtë garë me shije pozitive. Dy skuadra pa objektiva në fushë mbajnë të varur fatin e Austrisë dhe Shqipërisë, që do të luajnë deri në sekondën e fundit kartat e tyre.
Kuqezinjtë e vegjël kanë nevojë patjetër për një fitore në sfidën e radhës, teksa në rast barazimi duhet të shpresojnë për një humbje të bashkëmoshatarëve austriakë. Ndëkohë një fitore e këtyre të fundit do të shuante çdo ëndërr dhe shpresë të ngritur deri më tani për të besuar në renditjen e 7 më të mirave të vendeve të dyta për një biletë në Euro 2021./Halit Delibashi-Sport Ekspres/
