Karriera e Ardian Ismajlit po vjen gjithnjë e në rritje, teksa pas hapit të rëndësishëm duke kaluar Hajduku i Splitit drejt Specias, tashmë ka ardhur edhe momenti i shumëpritur për të. Mbrojtësi shqiptar zuri vendin e titullarit nga minuta e parë në Serie A dhe kundërshtar kishte një emër të madh si Interi. Por pavarësisht rivalit dhe cilësive që kishte përballë, Ismajli tregoi pastër përse ia vlejti investimi i bërë për të.
Futbollisti kuqezi shkëlqen në fushën e lojës, duke lënë një shije pozitive edhe në opinionin sportiv italian. Padyshim që pas një paraqitjeje të tillë është zgjuar edhe interesi përtej Adriatikut për të mësuar më tepër rreth tij. Babai i Ardianit, Ilmi Ismajli, ka zbërthyer për “Specia1906.com“ profilin e djalit të tij në një intervistë të gjatë.
Ndeshja e parë në “San Siro“ të Dielën. Cilat janë ndjenjat tuaja për këtë? Ardiani e kishte të vështirë para se të luante nga fillimi.
“Për mua, të shikoja Ardianin duke luajtur në “San Siro“ ishte një emocion unik, ai dukej i mrekullueshëm. Jam shumë krenar për të. Luajti një lojë të mirë duke treguar cilësitë e tij të mira. Siç e thatë ju, ai jetoi kohë të vështira“.
Si u përshtat Ardiani në ekip? Ishte e vështirë t’i afrohej futbollit italian?
“Ai u vendos mirë, kaloi shumë mirë me shokët e tij të skuadrës dhe krijoi një atmosferë të mirë në grup. Ishte shumë e vështirë për të që të përshtatej me futbollin italian sepse është shumë ndryshe nga futbolli kroat“.
Si mund ta përshkruani Ardianin? Cilat janë aftësitë e tij?
“Ai është një djalë që punon shumë me përkushtim, është shumë i motivuar. Ai ka një karakter të fortë dhe është një person me zemër të madhe. Është shumë i talentuar dhe ka aftësinë për t’u përshtatur me çdo lloj kampionati europian”.
Në Itali ishim kaq kurioz për të parë Ismajlin në fushë. A mendoni se tani është 100% gati? Edhe fizikisht?
“Besoj se Ardiani është 100% gati për të luajtur. Ai bëri shumë sakrifica për të arritur atje ku është. E di që ai ndihet i gatshëm për të dalë në fushë për të dhënë më të mirën për këtë fanellë”.
Spezia është për herë të parë në Serie A. Trajneri italian po rrit të gjithë lojtarët në skuadër. Çfarë mendon Ardiani për të?
“Ai ka krijuar një marrëdhënie të shkëlqyeshme me trajnerin, shkon mirë me të sepse di të nxjerrë më të mirën në secilën prej tyre. Ai po i bën të mirën ekipit. Pra, është shumë i lumtur dhe i kënaqur me marrëdhënien që ka krijuar me shokët e tij të skuadrës”.
Çfarë pret Ardiani nga kjo përvojë?
“Nga kjo përvojë Ardiani dhe unë gjithashtu presim që ai të jetë në gjendje të marrë shumë rezultate pozitive dhe të përmirësohet në një nivel tekniko-taktik. Ne gjithashtu shpresojmë që të arrijë piketa të tjera të rëndësishme”.
A mund të na flisni për Ardianin jashtë fushës? Pasioni i tij për futbollin, familjen, hobet, idhullin dhe ëndrrat e tij …
“Që në fëmijëri ai ka treguar talent dhe interes për futbollin. Pasioni i tij është shumë i fortë dhe falë vetëbesimit dhe vendosmërisë së tij, ai arriti të transferohej nga një ekip i vogël në Serie A. Ndërsa familja e tij, unë jam babai i tij dhe jam ekonomist, vëllai i tij studion për drejtësi dhe motra e tij është regjistruar në inxhinieri kompjuterike. Ardiani është një djalë që ka shumë hobi duke përfshirë leximin, daljet me miqtë, njohjen e vendeve të reja dhe luajtjen e basketbollit në kohën e tij të lirë. Idhulli i tij është Sergio Ramos. E admiron atë sepse është një luftëtar dhe nuk dorëzohet kurrë deri në fund të ndeshjes. Ndërsa ëndrra e tij ka qenë gjithmonë të bëhej një futbollist i suksesshëm”.
Edy Reja, trajneri i Shqipërisë, e konsideron Ardianin një lojtar të rëndësishëm. Ekipi i tij kombëtar është rritur shumë duke shkuar në Ligën B, me protagonist djalin e tij. Si ndihesh të shohësh Ardianin që përfaqëson kombin e tij?
“Kur e shoh duke luajtur me fanellën e kuqe ndjej emocione shumë të forta, kurrë nuk kam menduar se do ta shihja duke luajtur në ekipin kombëtar. Puna e tij me këmbëngulje dhe motivim më befasoi. Ky moment historik e meriton atë“, ka deklaruar Ilmi Ismajli./Halit Delibashi-Sport Ekspres/