Lëvizjet e bujshme të trajnerëve në Shkodër, Xhaferi sqaron largimin e Plorit dhe trajnerin e ri: Josa është një legjendë

0

Vllaznia mori një vendim të papritur mbrëmjen e sotme, ku zyrtarizoi shkarkimin e Plorit dhe afrimin e Mirel Josës në krye të pankinës. Për të dhënë më tepër sqarime në lidhje me këtë situatë, ka folur vetë presidenti i Vllaznisë. Alban Xhaferi është shprehur në emisionin “Ora Sport” në “Ora TV” se arsyeja e largimit të Plorit ishte mungesa e rezultateve. Nga ana tjetër ngre lart figurën e Mirel Josës, me të cilin thotë se do të ketë një projekt afatgjatë.

“Ne e bëmë këtë lëvizje, sepse rezultatet nuk janë të duhurat. Ishte një lëvizje e sforcuar. Sigurisht që po të kishim rezultate të tjerë nuk do e bënim atë lëvizje. Rezultati do shihet në fund. Një nga arsyet e ardhjes së profesor Josës është riformatimi i ekipit për sezonin e ardhshëm. Largimi i dy trajnerëve shkodranë? Dedja nuk është hequr, thjesht i ka mbaruar kontratë. Te pjesa e profesor Plorit, është një spostim. Kemi pasur diskutime të brendshme. Këtu bëhet fjalë për momente të vështira, momente delikate. Roli im në këtë rast është deçiziv.

Këtu bëhet fjalë edhe për një investim goxha të madh, i cili me mos arritjen e Kupës sigurisht që ka një dëmtim të jashtëzakonshëm për buxhetin që është caktuar për Vllazninë. Është një dështim në vetvete. Ne konsultohemi me njëri-tjetrin, me specialistë brenda klubit dhe jashtë tij, me dashamirës të futbollit. Këtu bëhet fjalë për një projekt afatgjatë, sepse profesor Mireli është një legjendë. Është një trajner që ka pasur rezultate të jashtëzakonshme. Kështu që ne po përgatisim Vllazninë e sezonit tjetër. Me këtë motiv është marrë profesori“, ka deklaruar Alban Xhaferi./Halit Delibashi-Sport Ekspres/

You might also like
Leave A Reply

Your email address will not be published.