Enea Koliçi dhe Blerim Kotobelli ishin protagonistë në fitoren e fundit me Kukësin. Portieri ishte vendimtar me pritjet e tij, kurse mbrojtësi i majtë dha krosimin nga edhe erdhi goli i parë i shënuar nga Xhevahir Sukaj. Sot të dy këta futbollistë dolën para mediave dhe ju përgjigjen pyetjeve të gazetarëve.
Koliçi foli fillimisht për ndeshjen e nesërme me Luftëtarin: “Normal që do të jetë një ndeshje shumë e vështirë, duke parë edhe ecurinë e Luftëtarit në këto ndeshjet e fundit. Është një ekip që nuk duhet nënvlerësuar. Kanë edhe një trajner shumë të mirë, që ka ndryshuar totalisht fytyrën e ekipit. Gjithsesi është një ndeshje që e luajmë në fushën tonë dhe kjo na favorizon. Besoj se do t’ia dalim me sukses”.
Në Vlorë ende nuk janë paguar futbollistët dhe normalisht nuk është e lehtë të motivohesh. “Motivi është vetëm trepikëshi. Duhet ta marrim që të vazhdojmë këtë ecuri pozitive që kemi pasur këto ndeshjet e fundit. Siç e thashë edhe më parë, do të jetë një ndeshje e luftuar nga të dyja krahët. Shpresoj t’ia dalim”, tha Koliçi.
Në fund ai jep një mesazh edhe për tifozët e Flamurtarit: “Tifozët do bëjnë detyrën e vet, sikurse kanë bërë deri më sot. I falënderoj për mbështetjen në këto ditë të vështira. I presim edhe në këtë ndeshje të na mbështesin”.
DEKLARATA E MBROJTËSIT – Blerim Kotobelli është ngacmuar që në fillin në lidhje me pagat. “Mendoj se është një situatë e vështirë, por presidenti na ka dhënë besimin se çështja shumë shpejt do të zgjidhet. Ne ashtu shpresojmë të ndodhë. Në fushë nuk e mendojmë pjesën e rrogave, mundohemi të japim maksimumin. Nuk kam çfarë them më shumë, thjesht do zgjidhet shumë shpejt”, deklaron mbrojtësi i majtë i vlonjatëve.
Sa i takon motivimit, Kotobelli shton: “Na motivon objektivi për kupat e Europës, ky është motivimi ynë i vetëm. Shpresoj ta mbajmë këtë vend dhe të arrijmë të realizojmë objektivin që ka klubi. Në fillim klubi donte kupat e Europës dhe ne shpresoj t’ia dalim. Ky është motivi ynë”.
“Shanset për Europën? Derisa ndodhemi në vendin e tretë, mendojmë për këtë pozicion. Do t’i marrim ndeshjet një e nga një dhe shpresojmë që të jemi. Janë ndeshje të vështira, sigurisht, sikurse kjo me Luftëtarin. Duhet ta vlerësojmë dhe të mendojmë vetëm për tre pikët”, përfundon mbrojtësi.