Në ditën e sotme ishte momenti që Kupa e Shqipërisë të kishte rolin e protagonizmit. Partizani ka arritur të fitojë ndaj Korabit në shifrat 1-3 falë dy golave të Skukës. Ky i fundit zgjodhi që të kërkonte ndjesë tifozëve të ish-ekipit të tij. Goli i tretë u shënua nga Murataj, ndërsa Beshiraj, ish-lojtari i Tiranës, shënoi golin e vetëm te Korabi.
Tirana nuk kishte aspak problem në ndeshjen me Lushnjen duke fituar me shifrat 0-3. Ndërkohë Vllaznia kishte një ndeshje të vështirë në transfertën e Bylisit. Jonuzi në të 37 dhe Kaina në minutën e fundit do t’i jepnin fitoren shkodranëve me shifrat 0-2. Më poshtë gjeni intervistat e trajnerëve për “Oversport”:
Josa: “Ishte ndeshje e vështirë, Bylisi ka zhvilluar ndeshje të mira që nga fillimi i kampionatit. E kemi freskuar pak skuadrën sot dhe mu përgjigjën mirë në fushë. I mbaj lojtarët me këmbë në tokë pasi në futbollin shqiptar ka diferenca të vogla. Coba? E kisha ngrënë pak hakun Cobas dhe prandaj luajti sot (qesh). Presion për ardhjen e Balajt? Përkundrazi, unë tani jam çliruar. Ishte shumë pozitive për mënyrën sesi reagoi ambienti. Klubi nuk është se nuk po afron lojtarët, por nuk është dakort me çmimet”.
Bellai: “E dominuam Vllazninë në të dy pjesët, por humbëm. Vazhdojmë problemin tonë si gjithmonë që krijojmë shumë raste dhe i shpërdorojmë. Vllaznia luajti me më shumë shpirt, është një nga ekipet më të mira të Shqipërisë. Nëse luan kundër tyre, duhet të japësh dyfishin. Vllaznia e meritoi fitoren”.
Dalipi: “Tirana është në nivel tjetër në raport me ne, ka shumë kualitet. Lushnja vërtet pësoi 3 gola, por kemi qenë serioz. Kemi bërë disa gabime individuale që duhet kohë pune për ta rregulluar. Kam vetëm 11 ditë në drejtimin e Lushnjes dhe të përballesh me Tiranën, është pak e vështirë. Nuk është ky kundërshtari ynë, kampionati jonë është ndryshe”.
Shehi: “E filluam ndeshjen shumë mirë, kur ndeshja shkoi 0-3, filluam të bëjmë menaxhimin e forcës pasi kemi ndeshje sërish pas tre ditësh. Xhixha ishte në gjendje gripale dhe nuk donim që ta rrezikonim. Xhixha? Është golashënuesi i kampionatit, këtë situatë e përjetuam edhe me Seferin. Është në fokus dhe herë pas herë shfaqet ndonjë skuadër që e kërkon”.
Kumbarce: “Kjo ndeshje ishte më tepër një provë për kampionatin. E dinim forcën e Partizanit, por terreni ishte i rënduar, shiu na vështirësoi shumë punën. Erdhëm për të luajtur në shtëpi për hir të tifozëve, prandaj nuk e luajtëm në Tiranë”.
Kolela: “Për mua është hap pozitiv, fituam 3-1 jashtë shtëpisë. Kemi bërë një ndeshje shumë të mirë dhe ishim pozitiv në gjërat që kemi bërë. Kam lojtarë cilësorë në ekip dhe mund të përballemi në të dy frontet, Kupë dhe kampionat, një ekip si Partizani nuk sakrifikon asgjë”.
Shënim: “Teksa gazetari i Oversport, Alinani, e pyet trajnerin Kolelën mbi të ardhmen e Skukës, tekniku largohet dhe e falënderon”.