Në fundin e vitit 2023, në nëntor, në Basel ndeshja mes Zvicrës dhe Kosovës u kthye në festë pasi shumë shqiptarë gjendeshin në stadium. Pavarësisht rasteve të shumta të Zvicrës, ndeshja përfundoi në 1-1.
Ashtu si shumë shqiptarë që bënë udhëtimin për në Bazel, edhe Driton Sedaj, 40-vjeçari që jeton në qytetin e Bielit, së bashku me djemtë e tij Luan 13 vjeç dhe Florian 10 vjeç, shkuan në stadium. Megjithatë, 10- vjeçari Floriani, fans i madh i Granit Xhakës, ka arritur të realizojë ëndrrën e tij, të bëjë një foto me mesfushorin e kombëtares zvicerane.
Floriani kaloi rojen e sigurisë dhe pas ndeshjes vrapoi në fushë dhe bëri një foto me Xhakën, ndonëse qëllimi i tij ishte fanella e yllit të futbollit. Sigurimi i stadiumit informoi Driton Sedaj se ai duhej të dorëzonte të dhënat e tij personale pasi djali i tij do të merrte një paralajmërim dhe ndoshta një gjobë, por 40-vjeçari nuk e mendoi se do të ishte shumë problematike.
Megjithatë, të premten familja Sedai ka marrë një letër nga Federata Zvicerane e Futbollit (SFV), në të cilën Floriani i vogël është gjobitur me 2597.15 franga. “Isha i shokuar. Nuk ka pasur asnjë kërcënim, askush nuk është shqetësuar për hyrjen e tij. Djaloshi 10 vjeçar nuk paraqet rrezik për askënd”, tha Driton Sedaj për Blick. “Shoqata Zvicerane e Futbollit ka para të mjaftueshme. Unë nuk mendoj se 2500 franga janë të drejta apo sportive. Sidomos pasi ne kemi paguar tashmë 60 franga për hyrjen. Po, Floriani është i shpejtë, por definitivisht jo më i shpejtë se roja i stërvitur. Ata duhet të ishin më të kujdesshëm”, tha Driton Sedaj. /Elio Hajdari-Sport Ekspres/