Këtu mund të gjeni intervistat e trajnerëve të Superiores pas mbylljes së 5 takimeve që nisën në orën 16:00:
Çela (Kastrioti): “Ishte një ndeshje shumë e bukur për t’u parë. Ishte një ekip që siç po shkon do të jetë në Kupat e UEFA-s. Luante edhe një ekip që donte të merrte pikë. Nuk ishte e shkruar që të shënonim një gol. Gjithsesi jam shumë i kënaqur për të gjithë çunat, jo vetëm për sot, por për gjithë sezonin. Shpresoj që klubi vitin tjetër në Kategorinë e Parë, të krijojë kushtet dhe të bëjë një shtëpi për të pretenduar më lart. Kam pasur dëshira nga ekipet e tjera, por dua të respektoj klubin dhe ta mbyll me sukses edhe këto dy javë. Të tregohemi profesionstë”.
Demrozi (Presidenti i Egnatias): “Mbi të gjitha arritëm objektivin që kishim, Kupat e Europës. Sot ishte një ndeshje shumë e rëndësishme. Fituam, por me vështirësi. Tani shpresojmë edhe për Kupën e Shqipërisë. Në këto dy vite kemi punuar shumë për të arritur objektivat. Falenderoj stafin, lojtarët, trajnerin Duro, që për një periudhë që ishte me ne dha dorën e tij. Tani të ecim përpara. Për vitin tjetër, të shohim, tani jemi shpejt. Padyshim që do të sjellim edhe lojtarë të mirë. Por 80% të ekipit nuk e lëvizim. Jemi në tratativa me 2-3 lojtarë. Sezonin e ardhshëm shpresojmë të jemi kampionë, pse jo?”.
Kolela (Partizani): “Jam i kënaqur që kemi arritur të fitojmë. Sigurisht që mund të kishim bërë më tepër sa i përket mënyrës sesi kemi luajtur. Tirana? Po, e kam kërkuar rezultatin sesa është Tirana kur u shfaqën minutat shtesë te ne”.
Martini (Teuta): “E kisha me frikë këtë ndeshje pasi na duhej me patjetër fitorja. Kishim shanset tona për ta mbyllur dhe nuk ia dolëm. Frika u shtua pasi futbolli është i poshtër dhe mund të na ndëshkonin. Kur unë erdha këtu ishte mbijetesa si objektiv, tani kërkojmë të shkojmë në Europë nëpërmjet kampionatit, do ta tentojmë”.
Sedloski (Vllaznia): “Kemi luajtur përballë Partizanit që kërkon titullin kampion. Kemi pasur rastet tona që ishin gola të sigurt dhe nuk kemi shënuar. Kundërshtari arriti të na ndëshkonte. Kur luan ndaj Partizanit dhe nuk shfrytëzon mundësitë e tua, është për të ardhur keq. Kam ardhur për të bërë punë të mirë, jemi akoma në lojë dhe do t’ia dalim”.
Hima (zëvendës trajneri i Laçit): “Kjo ishte finale edhe për ne, jo vetëm për Tiranën. Na vret mënyra sesi i pësojmë golat, aq lehtë. Tani kemi edhe dy finale të tjera. Nëse fitojmë, atëheë kapim Europën. Kemi punuar shumë në aspektin e mbrojtjes, por sërish pësojmë lehtë”.
Orges Shehi (Tirana): “Kjo ishte ndeshje e vështirë, e kemi interpretuar mirë. Një dorë te titulli? Nuk kemi mbaruar ende asgjë. Tani e kemi vetë në dorë titullin, duhet të bëjmë punën tonë. Fusha e Laçit është një nga më të mirat në Shqipëri, na lë që të interpretojmë mirë lojën tonë. Na vjen mirë që ia dolëm sot. Duhet të jemi gjithmonë vigjilent karshi kundërshtarëve”./Sport Ekspres/