Nga Klaudio Ndreca
Klaus Gjasula është një emër i njohur jo vetëm për tifozët shqiptarë dhe për mbështetësit e Paderbornit, por njëkohësisht edhe për arbitrat. Shumë të rrallë mund të jenë ata që nuk e kanë ndëshkuar njëherë mesfushorin shqiptar në Bundesligë.
Në fakt, “luftëtari ynë” ka kapur edhe rekordin absolut në elitën e futbollit gjerman. Në ndeshjen që po luhet ndaj Werder Bremen dhe po humbet në shifrat 0-3 është thyer edhe rekordi. Gjatë përballjes së shkuar Gjasula barazoi rekordin e Tomasz Hajtos, duke shkuar në 16 ndëshkime, por me përjashtimin që futbollisti i Paderborn nuk e kishte mbyllur ende kampionatin.
Nuk u vonua shumë dhe menjëherë në takimin e radhës, këtë ndaj Werder Bremen, ka mbërritur në 17 ndëshkime me karton të verdhë. I buzëqeshur dhe me sytë drejtuar te xhepi i arbitrit, Gjasula ka hyrë në librin e rekordeve të Bundesligës, ndërsa është për t’u marrë në studim pasi nuk është ndëshkuar ende me një karton të kuq. /Sport Ekspres/