Roma bën një goditje të rëndësishme në merkato, sepse drejtori sportiv Monçi ka gjetur marrëveshjen me PSG-në për blerjen e Havier Pastores, i cili do të firmosë deri në vitin 2022 dhe do të fitojë 4 milionë euro në sezon.
Bëhet fjalë për rikthim të fantazistit argjentinas në Itali, sepse para 7 sezonesh PSG e bleu nga Palermo për 42 milionë euro.
Në sezonet e fundit Pastore nuk ka qenë lojtar i rëndësishëm te PSG, duke luajtur shumë pak, ndaj tashmë kërkon ta rinisë nga Roma, që këtë verë po tregohet shumë aktive, sepse ka blerë edhe Çoriç, Markano, Kristante e Klajvert.
Për Pastoren, i cili nuk arriti të bëhej pjesë e Argjentinës për Kupën e Botës, është rasti ideal për të treguar se është ende lojtar i nivelit të lartë, pasi është vetëm 28 vjeç.