Xhani De Biazi shkarkohet nga detyra si trajner i Deportivo Alavesit, vetëm pak javë pasi mori drejtimin e skuadrës spanjolle.
Ish-trajneri i Shqipërisë mori drejtimin e Alavesit kur klubi spanjoll ishte në fund të tabelës, pa asnjë fitore.
Me italianin Alavesi arriti dy fitore në kampionat e një në kupë, por renditja mbetet mjaft shqetësuese, ndaj është arritur në marrëveshjen për prishjen e kontratës me efekt të menjëhershëm.
Nuk dihet ende nëse Alavesi ka vendosur divorcin, apo De Biazi kërkoi largimin, por e sigurt është që trajneri i njohur ka pasur bisedime me Australinë në të shkuarën dhe tashmë kombëtarja e vendit të kangurëve ka mbetur pa trajner, me Botërorin në horizont.
Madje, prova e radhës vjen nga facebook i tij, ku ka postuar një foto me imazhin e botërorit “Rusi 2018”.
Para pak ditësh De Biazi për Sport Ekspres konfirmoi pakënaqësinë e tij tek Alavesi: “Nuk e kthej dot ujin në verë. Prisja të gjeja një skuadër në cilësorë dhe ambient më të qetë, por është tepër e veshtirë”.
Sakaq, ne faqen e tij zyrtare në facebook, trajneri italian ka falënderuar klubin, lojtarët dhe tifozët:
“Gjëja e parë që them është: faleminderit Alaves! Faleminderit atyre djemve që punuan për të kthyer situatën, për të gjithë ata që ndihmuan dhe provuan të ndryshonin gjërat. Pengu më i madh është që nuk pata kohën e duhur për të krijuar një skuadër me një shpirt dhe identitet tjetër. Falënderoj edhe tifozët që kanë qëndruar gjithmonë përkrah skuadrës! Forca dhe besim djem! Forca Alaves!”