Derbi i sotëm mes Tiranës dhe Dinamos do të përbylli turin e dytë të Kupës së Shqipërisë. Ndeshja e parë u fitua nga Dinamo me shifrat 2-0, por Tirana mund ta kthejë rezultatin dhe këtë e tregoi në takimin e fundit në Superiore, teksa e dominoi Dinamon në të gjitha aspektet dhe fitoi me shifrat 4-0. Në një intervistë për “Sport Magazine” që moderohet nga Drilon Xhepollari, Dabulla është shprehur se ngjyra e kuqe ka qenë alergji për bardheblutë.
“Tirana-Dinamo do të jetë e luftuar nga të dy ekipet dhe shpresoj që të jenë si dy ndeshjet e para, që ishin të pëlqyeshme. Shpresoj se Tirana do ta kthejë rezultatin. Është shumë e vështirë duke parë rezultatin, por mundësi është aty. Nuk do të jetë tragjedi e madhe edhe nëse Tirana nuk e kthen ndeshjen. Kishin edhe fat lojtarët e Dinamos që arritën të mbanin portën e paprekur. Derbi i fundit që fitoi ndaj Dinamos më ka impresionuar dhe më kujtoi kohën time. Ishte hera e parë që Tirana dominonte në 75 minuta, në çdo aspekt, një kundërshtar me nivel të lartë. Totre, Seferi, Limaj dhe Xhixha janë në formë të mirë.
Edhe në kohën tonë Tirana-Partizani ka qenë më e zjarrtë dhe na kërkonin vetëm derbin, nëse fitonim derbin, nuk kishte problem nëse nuk e fitonim kampionatin. Vjen nga brenda kjo lloj kërkese dhe e trashëguar nga brezat para nesh. Përshembull, në ato vitet tona nuk lejoheshin në klub që të përdoreshin këpucët e kuqe dhe bluze të kuqe. Kishte raste që ishin persona që i kishin veshur dhe i thonin që duhej t’i hiqte, pasi nuk lejoheshin. E dua fitoren sot ndaj Dinamos që të përballemi me Partizanin pastaj, dua të shoh edhe dy derbi të tjera me Partizanin. Unë dëshiroj që drejtuesit e Tiranës të vendosin premio që të kalohet Dinamo se pastaj stadiumet do të mbushen dhe të ardhura do të jenë më të mëdha nga takimi me Partizanin”, tha Dabulla. /Sport Ekspres/