Yjet shqiptarë të Zvicrës së viteve të fundit kishin mundësinë më të mirë që të përfaqësonin origjinën e tyre pas pranimit të Kosovës nga organizmat më të lartë të futbollit. Dardanët kishin të drejtën për të marrë futbollistë nga të gjitha Kombëtaret e mundshme, nëse do të gjeni marrëveshjen me ta. Por askush nuk lëvizi nga emrat e shumëpërfolur përveç Valon Berishës, i cili nuk e mendoi dy herë për të lënë vendin e titullarit te Norvegjia dhe për të ardhur te Kosova. Sa i përket futbollistëve shqiptarë të Zvicrës, askush prej tyre nuk reagoi.
Në intervistën e dhënë gjatë kohëve të fundit të Valon Behramit për mediat në Kosovë, mesfushori u shpreh se askush nuk denjoi as që ta takonte, pasi ishte i gatshëm që të diskutonte rreth projektit për t’iu bashkuar dardanëve. Këto fjalët do të hidheshin poshtë shpejt nga ish-trajneri i Kosovës, Bunjaku, që mes të tjerash u shpreh se i kishte ofruar edhe shiritin e kapitenit Behramit.
Deri në këtë moment jemi duke folur për historinë e diskutuar edhe më herët. Por rrëfimi i ri i Valon Behramit për mediat në Zvicrës, sipas asaj që raporton “Insporti”, tregon qartazi dyfytyrësinë e turpshme të lojtarit. Kur është pyetur në lidhje me zgjedhjen e Kosovës, Valoni është shprehur se nuk e ka menduar kurrë ndërrimin e vendimit.
“Ju e dini si kam mbërritur në Zvicër. Me asgjë. Nuk ka qenë e lehtë për mua si shqiptar. Jam krenar që kam dëshmuar se bëj gjithçka për Zvicrën. Unë kurrë nuk e kam konsideruar të luaj për Kosovën, as kur u bë e mundur. Ka qenë shumë e qartë për mua se do t’i jepja gjithçka Zvicrës”, u shpreh Behrami.
Pra një fytyrë në mediat shqiptare për të treguar dashurinë ndaj origjinës, por që nuk u panë kurrë dhe nuk janë kontaktuar në asnjë moment nga pjesëtarët e Federatave, për t’i deleguar gjithë përgjegjësinë, ndërsa në mediat zvicerane tregojnë gjithë besnikërinë për ngjyrat helvete duke u shprehur se nuk e kanë menduar në asnjë moment që të ndërrojnë zgjedhjen e tyre. Atëherë, kush pjesë e historisë është e vërteta Valon? /Sport Ekspres/