E shkarkuan pa asnjë shpjegim, “Ultras Guerrils” reagon për drejtuesit e Partizanit: Historia për ju nis kur zini zyrën, Pano dhe Partizani janë sinonime

0

Si mund të shkarkohet një trajner fitues? Te Partizani nuk mësojnë nga gabimet, teksa pas Gegës, këtë herë do të largohej Ledio Pano që ia doli me sukses në ekipin e moshave. Pa asnjë shpjegim të vetëm, Pano do të merrte mesazhin në telefon që i njoftonte shkarkimin. Kjo ka sjellë edhe reagimin e ashpër të tifozëve të Partizanit, Ultras Guerrils, të cilët kanë thumbuar klubin.

“Klubi Partizani ka marrë trajtat e një ekipi privat i cili dita ditës i largohet asaj që përfaqëson klubi më i madh dhe më popullor ne Shqipëri. Sa më shumë i largohet historisë dhe asaj çka përfaqëson fanella më e rëndë në vend aq më i madh bëhet hendeku që ka bërë shumë tifozë të largohen, ta refuzojnë dhe ta braktisin para një lloj arrogance të tillë.

Një arrogancë që fillon që me ndryshimin e simboleve të klubit për gusto personale, e mbaron në largimin nga klubi i simboleve që përbëjnë trashëgiminë e lavdisë së këtij klubi. Duhet guxim i madh që të shkarkosh dhe largosh nga klubi PARTIZANI një PANO.

PANO dhe PARTIZANI janë sinonime, dhe veprimet e klubit tregojnë të kundërtën e asaj që duhet të tregojë një klub i madh. Për disa në klub historia e Partizanit  fillon në ditën kur kanë zënë zyrën, e ndoshta mbaron në ditën që e lënë, ndërsa në zemrat e tifozëve ngelin shenja të cilat nuk zhbëhen ashtu siç nuk mund të zhbëhet historia e as shija e hidhur që na lënë veprime te tilla. Ledjo Pano i ka lënë shenjat e veta”, shkruhet në reagim. /Elio Hajdari-Sport Ekspres/

You might also like
Leave A Reply

Your email address will not be published.