Kylian Mbappe “i vuri flakën” PSG-së me intervistën e tij. Duket qartë se sulmuesi 24-vjeçar nuk dëshiron të luajë më për kampionin e Ligue 1 dhe ka fyer jo pak klubin e tij. Në intervistë, francezi tha, ndër të tjera, se PSG është një klub i ndarë dhe pranon se është egoist sepse lojtarët e mëdhenj thjesht duhet të jenë të tillë.
“Pse e konsideroj këtë sezonin tim të fundit në Ligue 1? Thjesht, unë jam një konkurrent dhe dua të fitoj. Nuk ka rëndësi kundër kujt luaj, çfarë fanelle vesh dhe për cilin klub, nuk qetësohem kurrë. Dua të fitoj, dua Champions League. Nuk do të jem kurrë i kënaqur”, tha Mbappe dhe vazhdoi.
“Çfarë i duhet PSG-së për të fituar Ligën e Kampionëve? Mos më pyesni mua. Ne bëmë atë që duhej në fushë. Pyetni njerëzit që krijuan ekipin, që sollën lojtarët dhe që drejtuan klubin. Unë thjesht përpiqem të bëj punën time dhe të jem më i miri. Kam shënuar rreth 40 gola për klubin dhe rreth 10 për ekipin kombëtar. Kam qenë lojtari më i mirë dhe golashënuesi më i mirë për pesë vjet rresht në Ligue 1.
Fakti që luaj në PSG nuk më ndihmon shumë sepse ky është një ekip dhe klub i ndarë. Sigurisht që tërheq shumë thashetheme, por unë jam mësuar me të. Unë e shtyj veten deri në kufi. Njerëzve nuk u pëlqen ta thonë, por një karrierë do të thotë egoizëm. Është e jotja dhe ti e lë pas. Unë jam gjithmonë i pakënaqur dhe nuk më bën kurrë përshtypje me atë që bëj.
Gjithmonë i them vetes se mund të bëj më mirë. Unë kam këtë uri për të fituar dhe nuk dua të jem në një ekip ku është e rëndësishme të marr pjesë. Prandaj njerëzit mendojnë se jam arrogant. Unë nuk jam i tillë. nuk është në natyrën time. Nuk kam frikë të them gjithçka që dua edhe kur gjërat nuk shkojnë ashtu siç dua”, tha Mbape. /Sport Ekspres/