Shqipëria zhgënjen edhe në ndeshjen e saj të fundit për këtë muaj. Kombëtarja nuk ka arritur të mposhtë dot as Estoninë në takimin e sotëm miqësor të zhvilluar në “Air Albania”. Ndeshja ka përfunduar në barazim 0-0 dhe tregoi problemin e kuqezinjve për të gjetur rrjetën e kundërshtarit. Pavarësisht se ndaj Estonisë ishte një përballje miqësore, një fitore do të ishte një sinjal i mirë zgjimi për Kombëtaren, pas atyre rezultateve tërësisht zhgënjyese kundër Islandës dhe Izraelit. Pas përfundimit të ndeshjes, lojtarët dhe trajneri kanë dhënë intervistat e tyre për “Supersport”.
Reja: “Ne kishim punuar shumë që të krijonim sa më shumë raste. Bajrami është lojtar interesant. Ka aftësi të mira teknike. Edhe Muçolli po ashtu. Duhet të kemi kujdes këta lojtarë, që ti kemi për të ardhmen. Përmend edhe Cokajn dhe Mersinajn, të cilët i kam ndjekur prej kohësh. Po mundohemi të afrojmë sa më shumë lojtarë të rinj që luajnë në kampionatet e huaja.
Mund edhe ta ndryshojmë. Edhe sot bëra disa ndryshime, me Uzunin. Por pati momente që u humb ekuilibri. Duhet të bëjmë diçka nga mesfusha e lart. Skuadra duhet të jetë më konstante. Kishim Vrionin dhe Seferin që provuan. I hodhëm titullarë, por nuk e kemi ende një lojtar që të zgjidh ndeshjen. Kur ke disa lojtarë mund të luash me skema të ndryshme. Ne jemi një skuadër e mirë, por duhet të përmirësohemi më shumë. Të tregojmë më shumë dashuri për fanellën. Nuk mund të krahasohemi me Francën apo Anglinë, por me ekipet e tjera po. Duhet të krijojmë një grup me lojtarë që e duan këtë fanellë, vetëm kështu mund të rritemi. Kur kam ardhur kam folur me Gjimshitin, me Veselin dhe më kanë thënë që duam siguri mbrapa, nuk ndiheshin mirë me 4. Unë gjithmonë në karrierën time kam provuar 4-3-3”.
Broja: “Them se kur stërvitemi më shumë dhe kur shihemi për çdo ditë si shihemi në ekip është më rehat. Kur vijmë një herë në muaj dhe stërvitemi 4-5 ditë bashkë është e vështirë ndonjëherë ti kuptosh të gjithë lojtarët. Në stërvitje shkoi shumë mirë, por në ndeshje nuk doli rezultati mirë. Kemi pasur raste për të bërë gol, por nuk kemi pasur fat ndonjëherë. Sulmi nuk është vetëm 2-3 lojtarë, është tërë ekipi. Sulmi nis nga portieri. Ai nis pasimet. Të gjithë lojtarët duhet të hyjnë në zonë për të bërë gola. Të vazhdojmë të stërvitemi mirë si grup dhe të komunikojmë me njëri-tjetrin. Atëherë mund të arrijmë gjëra të mëdha. Duhet të komunikojmë më shumë dhe të jemi më të përqendruar te ndeshja. Skema është stili i trajnerit. Cfarë bën trajneri nuk mund ta ndryshosh. Ai e zgjedh lojtarin dhe formacionin”.
Cekiçi: “E kemi parë edhe në dy ndeshjet e fundit ndodh e njëjta gjë. Rrotullohemi atje në zonë dhe bllokohemi. Nuk e di pse ndodh. Le të shpresojmë që me fillimin e kampionatit të ndryshojë. Besoj se nuk ka të bëjë me skemën. Ndihem më mirë në numër 10-sh. Nëse do kishte ëinger, do bëja rrotacionin me të”.
Bajrami: “Jam shumë i lumtur me debutimin. Ishte një lojë e mirë nga ana ime. Pjesa e parë ishte pak me emocione. Në pjesën e dytë isha më mirë. Karakterin dhe personalitetin e kam. Unë e kam pasur gjithë jetën. Ashtu jam, ashtu luaj, ashtu stërvitem. Besoj do jem pjesë edhe në të ardhmen. E dinim që Estonia do rrinte shumë mbrapa. Detyra jonë ishte ta qarkullonim topin majtas-djathtas që të hapeshin hapësira dhe të fusnim topin për sulmuesit”.
Vrioni: “Kërkuam të fitonim ndeshjen. Patëm raste. Në pjesën e parë pata unë një rast me kokë, patëm më shumë raste. Tani duhet të pushojmë dhe të bëhemi gati për në shtator në Nations League. Unë besoj te ky grup. Në shtator do të kërkojmë të marrim maksimumin e pikëve. Në stërvitje punojmë të gjithë së bashku për të kërkuar golin edhe në ndeshje. Do kërkojmë ne sulmuesit të bëjmë gola që Shqipëria dhe tifozët të fitojnë. Mesfushorët na kërkojnë. Duhet të japim vetëm maksimumin dhe të bëjmë gola, sepse është ajo që trajneri na kërkon”./Halit Delibashi-Sport Ekspres/