Dinamo është një nga tre skuadrat më me emër të kryeqytetit, por prej vitesh ndodhet në pozita aspak komode, pasi prej disa vitesh ndodhet në kategorinë e parë dhe ka rrezikuar jo pak që të bjerë dhe më poshtë. Përmes një postimi në “Facebbok” tifozët e Dinamos janë mjaft të indinjuar për situatën që ndodhet skuadra në prag të edicionit të ri. Në postim thuhet se nën drejtimin e Igli Allmuçës janë vetëm 10 futbollistë dhe ekipi është i detyruar që të stërvitet në kalçeto. Një situatë aspak e mirë, pasi edicioni i ri pritet që të jetë akoma dhe më i vështirë.
“Më shumë se e turpshme… Në stërvitjen e Dinamos nën drejtimin e trajnerit Igli Allmuça kanë zbritur vetëm 10 lojtarë të cilët janë: Ilir Allmuça, Tragaj, Çema, Nuriu dhe pak lojtarë të ardhur nga akademia e të rinjve. Gjendje më e mjerueshme si fillim, pasi nuk kemi vend për stërvitje përveç kompleksit ‘Aquadrom’ dhe tani me përgatitjet për sezonin e ri që akoma duhet të shpresojmë për mos të rënien nga Kategoria me këtë kontingjent që zotërojmë”.
“Më vonë Dinamo mund të lidhë një kontratë me kompleksin Internacional në Peze-Helmes për kryerjen e seancave stërvitore, aty ku ekipi dinamovit luan dhe ndeshjet si ekip pritës në kampionat. Ne tifozët po vuajmë çdo vit e më shumë për këtë ekip. Gjithsesi Forca Dinamo”, përfundon postimi në “Facebook”.