Shqipëria U17 për femra ka mësuar ekipet kundërshtarë për kualifikueset e kampionatit Europian “Suedi 2020”. Shorti është hedhur ditën e sotme në Nion të Zvicrës dhe vajzat kuqezi do të bëjnë pjesë në grupin 7.
Greqia, Lituania dhe Republika e Irlandës janë rivalet e Shqipërisë. “Qualifying Round” U-17 do të zhvillohet në Lituani më 10, 13 dhe 16 shtator të vitit 2019. Në total janë 11 grupe dhe në raundin elitë kalojnë dy ekipet e renditura të para në grupe.
Gjithashtu edhe katër ekipet e treta më të mira kalojnë më tej, për të plotësuar numrin e 26 skuadrave që marrin pjesë në “Elite Round”. Vajzat kuqezi do mundohen të bëjnë një paraqitje dinjitoze, pasi vetëm së fundmi është formuar kjo grupmoshe dhe ekipi përbehet nga vajza shumë të vogla.