Partizani është ende i tronditur nga një barazim tejet zhgënjyes në Lushnjë, por ka ende gjithçka në dorën e vet për sa i përket kualifikimit në Europa League. Këtë e ka të qartë trajneri Klevis Dalipi, i cili kërkon një sforcim të skuadrës në ndeshjet e mbetura, me dy sfidat e radhës që janë vendimtare për fatet e sezonit.
SFIDAT E RADHËS
“Lënia e dy pikëve në Lushnjë na ka goditur. Ndeshja me Teutën përcakton shumë edhe transfertën e mëpastajme me Luftëtarin, ku do të luhen të gjitha kartat. Parashikoj një duel të vështirë, sepse Teuta i ka jetike pikët për mbijetesë. Ne kemi objektivat tanë për Kupat e Europës dhe duhet të japim më të mirën”.
RËNIA
“Kur u emërova si trajner, pashë një skuadër të uritur për të fituar. Morëm katër fitore dhe një barazim dhe, pas ndeshjes me Laçin, e përgatitëm skuadrën psikologjikisht se nuk kishte përfunduar asgjë. Në analizën time, në këto rezultate ka ndikuar fakti që është shkruar në gazeta, se do të afrohet trajner i ri. Po ashtu, ka ndikuar edhe euforia, pasi jetojmë në Shqipëri dhe, kur merr rezultate të mira, kjo gjë ekziston. E rimorëm veten duke zhvilluar një pjesë të parë të mirë me Skënderbeun, ndërsa në të dytën pësuam një gol të pamerituar. Kjo na dëmtoi moralisht. Javën e kaluar kishim një transfertë të lehtë në letër, me Lushnjën. Në ndeshje të tilla finalizimi në fillim është i rëndësishëm, por ne nuk shënuam dot. Kishte raste të diskutueshme me arbitrimin, ku një penallti në favorin tonë ishte e qartë fare. Sidoqoftë, nuk dua të merrem me këtë pjesë së gjërave. Bëmë ndërrime dhe lojtarët që u futën ishin në ritëm të mirë, por në fund morëm vetëm një pikë. Lojtarët duhet të jenë më altruistë, të mos veprojnë e luajnë individualisht, por të japin maksimumin si grup.
FORMACIONI
“Ndryshimet kanë qenë të detyruara, kemi bërë lëvizje për arsye teknike. Me Skënderbeun luajta me Trashin si mbrojtës i majtë, i cili sulmon mirë. Edhe Kotobelli është stërvitur mirë, por zgjedhjet janë të tilla. Edgar Çani nuk do të jetë në ndeshjen me Teutën, për shkak se kështu vendosën mjekët. Fejzullahu është në përmirësim, por mendoj se nuk është akoma në gjendjen, që e njoh. Ndeshjet janë të vështira dhe nuk dua ta vë në vështirësi, pasi nuk ka gjendjen më të mirë fizike”.