Trajneri i Empolit ka folur përpara gazetarëve në konferencën për shtyp në prag të ndeshjes hapëse të Serisë A, asaj kundër Veronës. Gazetarët e kanë pyetur edhe për Stiven Shpendin, i cili u transferua këtë verë nga Cesena. Paolo Zanetti i ka thurur elozhe lojtarit shqiptar, të cilin e konsideron një sulmues të kompletuar.
“Unë mendoj se në të ardhmen ai do të jetë një qendërsulmues i madh, modern, që sulmon hapësirat, që ka shpejtësi të madhe dhe teknikë të mirë. Ai duhet të jetë i strukturuar fizikisht për të përballuar duelin, por është i ri. Shpejtësia e tij e bën atë të dobishëm edhe për krahët në rast nevoje.
Ai është ndryshe nga Cancellieri, por duke sulmuar hapësirat dhe duke u afruar me sulmuesin tjetër ai mund të veprojë si sulmues i dytë dhe të luajë në krah pa zotërim topi. Është një lojtar i kompletuar dhe unë mendoj se Empoli ka marrë një djalë me perspektivë të madhe”, ka deklaruar Paolo Zanetti./Halit Delibashi-Sport Ekspres/