Frank Leboeuf ka qenë në qendër të kritikave nga tofozët e Cristiano Ronaldos. Shkak janë bërë komentet e analistit të “ESPN”-së për yllin portugez. Pas formës mjaft të mirë të treguar në dy ndeshjet e fundit me Kombëtaren, tifozët e Ronaldos kanë përfituar nga ky moment për t’i treguar Leboeuf se kishte mbajtur qendrim të gabuar për 5 herë fituesin e Topit të Artë. Megjithatë ish-futbollisti francez nuk i ka kursyer ironitë, duke i kujtuar tifozëve faktin se ai ka fituar një Kupë Bote, ndërsa Ronaldo nuk e ka një trofe të tillë.
“Kritikët thanë se nuk e kuptoja, se Ronaldo na kishte treguar se ne në ESPN nuk dinim asgjë për futbollin. Se unë kurrë nuk do të jem në nivelin e Ronaldos. Epo, ata kishin të drejtë. Unë kurrë nuk kam qenë në nivelin e tij. Unë fitova kampionatin botëror dhe ai jo”, tha Frank Leboeuf./Halit Delibashi-Sport Ekspres/