Vllaznisë i ka ikur fitorja nga duart në transfertën e Teutës vetëm në sekondat e fundit. Pas shpërdorimeve nga të dy ekipet, goli i parë do të shënohej nga Latifi në të 60. Një penallti e akorduar me VAR në favor të shkodranëve dhe Latifi që gjen rrjetën. E kur pritej fundi i takimit, në të 99 ishte Ivanovic që shënoi për Teutën duke mos gabuar para portës.
Nga ana tjetër në barazim pa gola ka mbaruar ndeshja mes Skënderbeut dhe Partizanit. Një përballje pa shumë raste dhe e luajtur më shumë në mënyrë të kujdesshme nga ekipet. Korçarët tentuan fitoren në minutat e fundit dhe Mara iu afrua jo pak në minutën e 80. Duke imituar Lionel Mesin, Mara kaloi 5 lojtarë të Partizanit në driblim dhe në fund i dha topit më shumë forcë, për t’i lënë mundësinë Hoxhës që të ndërhynte. Më poshtë gjeni intervistat e trajnerëve për Supersport:
Plori: “Ndonjëherë njeriu e humb qetësinë, e kam kaluar pak cakun sot dhe kërkoj ndjesë. Zemërimi ishte te momenti i fundit, tek goditja e këndit e Teutës ishte faull për ne. Nëse do të jepej faull, atëherë do të mbyllej loja. Ai faull aty do të mbyllte ndeshjen dhe mua më mohoi dy pikë sot. Nga ai faulli erdhi goditja e këndit dhe nga goditja e këndit mbërriti goli, janë detaje të vogla që vendosin ndeshjen. Megjithatë ne sot kemi qenë të ekuilibruar, por duhet të jemi pak m të zgjuar në mënyrën sesi menaxhojmë ndeshjen”.
Mehmeti: “Kjo ishte ndeshja më e dobët që kemi interpretuar që nga janari. Ka ndikuar edhe lodhja nga 120 minutat me Vllazninë. Kjo ishte një ndeshje delikate, teksa rivali u mbrojt me shumë forca. Jam shumë i pakënaqur për mënyrën sesi e interpretuam lojën. Përgjegjësia kryesore është tek unë. Përgjegjësia është te unë pasi mund të menaxhoja më mirë pjesën e psikologjisë dhe lodhjes së lojtarëve”.
Arapi: “Jam shumë i kënaqur me vetë mënyrën sesi erdhi kjo pikë. Por ajo që më ka pëlqyer më tepër është grinta dhe shpirti i lojtarëve. Nëse vazhdojmë si në këto dy takime të fundit, atëherë edhe fitorja do të vi. Kjo situatë ku ndodhemi nuk i shkon përshtat Teutës”.
Gega: “Nuk e ndala unë Partizanin, mund të fitonte vet. Jam rritur në atë ekip, në atë fanellë që kam vetëm mirënjohje dhe respekt, por i tillë është profesioni. Që kur kam ikur unë nga Partizani janë ndërruar 5 trajnerë. Tani po jap kontributin tim te Skënderbeu dhe po mundohem t’i marrë më të mirën lojtarëve. Unë dua që Skënderbeu të dali me kokën lart në fund”.