Sfida e luajtur në “Elbasan Arena” ka përfunduar me shifrat 0-0. Pjesa e parë ka qenë e ftohtë dhe pa raste, ndërsa e njëjta gjë nuk vlen për fraksionin e dytë të ndeshjes. Në 45 minutat e dyta skuadrat janë futur me tjetër ritëm, ku në të dy krahët kanë pasur shanset e tyre për të ndryshuar fatin e ndeshjes.
Në sekondat e fundit të minutave shtesë Aralica mposht Alban Hoxhën, i cili pavarësisht devijimit nuk mund ta shmangë golin. Në kampin shkodran nis menjëherë festa, por që shpejt i lë vendin ankthit dhe nervozismit. Gjyqtari i takimit shkon të shohë pamjet në VAR, duke ndryshuar më pas vendimin e tij dhe anullon golin.
Kaq ka mjaftuar që të shpërthejë tensioni, teksa sapo është dëgjuar vërshëllima përfundimtare lojtarët e Vllaznisë kanë rrethuar menjëherë gjyqtarin. Madje është dashur ndërhyrja e forcave të sigurisë për të larguar trupën gjykuese nga fusha. Në këto kushte, do të jetë gjysmëfinalja e dytë në “Loro Boriçi” ajo që do të vendosë gjithçka sa i përket ekipit që do i shkojë deri në fund kompeticionit të Kupës së Shqipërisë. Pas përfundimit të ndeshjes, trajnerët kanë dhënë intervistat e tyre për “Gol pas Goli“ në “Supersport“.
Mehmeti (Partizani): “Të tilla ndeshje sjellin jo qetësi në aspektin psikologjik. Është ndeshje që ndikon shumë në kualifikim, Por s’jam dakort për faktin që do të ishte 0-1. Mendoj që duhet të ishim më cinik me situatat me Xhuniorin dhe Skukën. Sidomos te rasti me kokë, Skuka duhet të ishte më altruist të shërbente për Xhuniorin. Janë situata që kthejnë ndeshjen. Na mungon kjo gjë. Jam shumë jo i kënaqur për sa i përket 20 metrave të fundit. Është shans. Duke pasur parasysh ndeshjen në kampionat ,të humbësh shumë raste dhe me një lojtar më tepër…Por sot është histori tjetër. Goli i anulluar? Nuk më vjen keq fare. Shiheni dorën që Aralica i ka vënë Matondos dhe nuk e ka lënë. Shikoni dorën që e ka shtyrë. Mendoj që në të dyja frontet, pavarësisht se në kampionat jam shumë i pakënaqur për mënyrën se si i kemi lënë pikët, sepse nuk na kanë dominuar por kemi bërë gabime individuale. Kjo më shqetëson më tepër pasi me 3-4 pikë më shumë do të ishim më lart“.
Plori (Vllaznia): “E pashë dhe njëherë në përsëritje. E çuditshme është vetëm fakti se diskutohet shumë në studio që ne nuk bëjmë mirë që flasim për arbitrat. Por në këto raste duhet të flaim se kemi gjithë investimin aty. Në rregull, mund të mos e japësh, por të shkosh ta shikosh dhe pastaj të mos e japësh vetëm të jesh budalla. Vijmë nga një moment i keq, pas një humbje me Egnatiën dhe ambienti zien. Të shkosh ta shohësh dhe më pas ta anullosh kjo më duket e çuditshme. Duhet të gjej forcë te ky gabim i arbitrit dhe të motivoj skuadrën“./Halit Delibashi-Sport Ekspres/