“Ne do të na shihni me rivalët direkt”. Ky ishte premtimi i Ramadanit pas humbjeve të fundit të Egnatias ndaj rivalëve që pretendojnë titullin kampion. Fjala është mbajtur dhe është arritur fitorja në një finale mbijetese kundër Skënderbeut.
Me entuziazmin e tifozëve, vendasit u ndezën që në pjesën e parë. Goli i parë erdhi nga Augusto pas predhës së Ademit që do të grushtohej dhe lihej topi në zonë nga ana e portierit të Skënderbeut. Ndërkohë pjesa e dytë ishte disi më e barabartë, por Xhekson mbylli llogaritë me një super gol. Më poshtë gjeni intervistat e trajnerëve për “Supersport”:
Memelli: “I kemi pasur shanset për të shënuar në të parën dhe në të dytën, por nuk ia kemi dalë. Ky është futbolli dhe duhet ta pranojmë humbjen. Jemi të mërzitur, por ajo që duhet të kuptojmë është që të jemi më tepër altruist për shokun e ekipit. Grupi duhet të ngrihet mbi individin dhe çdo rezultat. Dua të kthehen lojtarët e dëmtuar dhe të plotësohet ekipi. Kishim 3 lojtarë të rëndësishëm me karton që nuk luajtën. Duhet të ulim kokën dhe të punojmë”.
Ramadani: “E dinim që nëse do t’i linim të luanim, do ta kishim të vështirë. Kjo ndeshje nuk ishte për t’u luajtur, por për t’u fituar. Nuk kemi pësuar gol dhe objektivi ynë dihet, këto janë më shumë se 3 pikë pasi vijnë ndaj rivalit direkt. Augusto ka potencial të madh, është vetëm i datëlindjes 1999 dhe e ka lënë disi mbrapa dëmtimi. E njohim kualitetin e tij. Ofendimet e tifozëve? Nuk kemi se çfarë të bëjmë, ata paguajnë biletën dhe ndonjëherë na shajnë edhe ne”. /Elio Hajdari-Sport Ekspres/