Skënderbeu ka arritur që të fitojë finalen e mbijetesës kundër Bylisit në shifrat 2-1. Nëse korçarët do të humbisnin në këtë përballje, atëherë do të ishin me një këmbë në Kategorinë e Parë. Miqtë kaluan të parët në avantazh me Desancic pas kombinimeve të bukura mes lojtarëve. Por brenda dy minutash korçarët përmbysën gjithçka falë golit të Vangjelit dhe Berishës.
Në shifrat 2-1 do të mbyllej pjesa e parë që njëkohësisht vendosi edhe historikun e 90 minutave. Nga krahu tjetër surpriza e madhe ka ardhur në ndeshjen Apolonia-Kastrioti. “I mbyturi, të mbyt”! Kjo shprehje shkon më së miri për krutanët që janë mundur nga skuadra që cilësohet si e Kategorisë së Parë dhe që ka shumë pak shpresa mbijetesë. Dopieta e Mario Gjatës vendosi ndeshjen, ndërsa Daci vetëm sa do të ngushtonte diferencat. Më poshtë gjeni edhe intervistat e protagonistëve për “Supersport”:
Dovedan (Bylis): “Kemi shënuar golin e parë dhe na kanë anuluar një gol tjetër të rregullt. Ja shiheni, çfarë të them? E dinim që kështu do të ndodhte, që arbitri do të vepronte kështu. Sa herë kemi dashur ne që të fitonim ndodhin këto gabime të arbitrave”.
Kamarata (Apolonia): “Jam i lumtur me shpirtin e garës të lojtarëve dhe kështu dua që të vazhdojmë deri në fund. Jeta më ka mësuar që nëse ka edhe një shpresë të vogël, përse të mos e luash? Në pjesën e parë kemi bërë një ndeshje shumë të mirë dhe në të dytën luajti edhe kundërshtari. E thashë edhe në ndeshjen me Bylisin se duhet të japim maksimumin për veten tonë. Nëse e ndajmë në përqindje kemi vetëm 10% shans për mbijetesë. Lojtarët kanë dhënë më mirën që kur erdha unë, megjithëse ne kemi limitet tona”.