Komisioni i Disiplinës ka zbardhur vendimet e marra sa i përket sjelljes së skuadrave të futbollit shqiptar në ndeshjet e javës që lamë pas. Laçi ka humbur shërbimet e lojtarit Ardit Deliut. Ky i fundit nuk do të jetë në dispozicion të trajnerit Shpëtim Duro për dy ndeshjet e radhës. Shkak për këtë vendim janë bërë protestat e tij ndaj arbitrit në përballjen e fundit.
Ndërkohë lista këtë herë vazhdon me kampionatin e moshave, ku Kastrioti U21 humb ndeshjen në tavolinë si dhe i zbriten 3 pikë nga klasifikimi për arsye se braktisi ndeshjen kundër bashkëmoshatarëve të Turbinës./Halit Delibashi-Sport Ekspres/
Vendimet e Komisionit të Disiplinës:
1. Lojtari i KF Laçi, Ardit Deliu, për protestë ndaj vendimeve të zyrtarit të ndeshjes, në bazë të nenit 55/2 të KDS, dënohet me 2 (dy) ndeshje pezullim nga aktiviteti.
2. KS Kastrioti U-21, për braktisjen e ndeshjes së vlefshme për Kampionatin Kombëtar të Kategorisë Superiore U-21, kundër KF Turbina U-21, në bazë të nenit 54/1 të KDS dhe nenit 29/1 të Rregullores së Veprimtarisë Futbollistike, humbet ndeshjen në tavolinë me rezultatin 3-0 dhe i zbriten 3 pikë nga klasifikimi.
3. Lojtari i KF Tirana U-21, Ergi Brahja, për goditje me grusht ndaj kundërshtarit, në bazë të neneve 47/1/e dhe 47/4 të KDS, dënohet me 12 (dymbëdhjetë) ndeshje pezullim nga aktiviteti.
4. Lojtarja e Tirana Femra, Anela Vishkulli, për sjellje josportive ndaj zyrtarit të ndeshjes, në bazë të nenit 48/1/a të KDS, dënohet me 12 (dymbëdhjetë) ndeshje pezullim nga aktiviteti.
5. Juban Danja – Femra, në bazë të nenit 12 të KDS, paralajmërohet se në rast të përsëritjes së dështimit në përmbushjen e përgjegjësive, do të jetë subjekt i masave disiplinore që parashikon Kodi i Disiplinës Sportive dhe Rregulloret e FSHF.
6. Lojtarja e Skënderbeu – Femra, Verije Binjaku, për sjellje josportive ndaj zyrtarit të ndeshjes, në bazë të nenit 48/1/a të KDS, dënohet me 4 (katër) ndeshje pezullim nga aktiviteti.
7. Rrëzimin e kërkesës së lojtarit të FC Besa U-17, Enton Nova, si të pabazuar në Kodin e Disiplinës Sportive.
8. Rrëzimin e kërkesës së lojtarit të KF Sopoti, Orgest Tanushi, si të pabazuar në Kodin e Disiplinës Sportive.