Realdo Fili del edhe zyrtarisht i lirë në treg. Partizani me fjalë pretendonte se nuk do ta lëshonte dhe se do ta huazonte diku, por e vërteta është se që para sherrit me Sulejman Starovën klubi e kishte nxjerrë jashtë planeve të veta, duke e njoftuar dy ditë para mbylljes së merkatos se duhej të gjente ekip tjetër.
Ky ishte një vendim i papritur për Filin, i cili e nisi rifillimin e kampionatit si titullar. Ai luajti nga minuta e parë në ndeshjen ndaj Flamurtarit dhe pak ditë para mbylljes së merkatos, nuk e priste të dilte në rrugë të madhe. Gjithsesi, Fili është vetëm 21 vjeç dhe sot ka dalë i lirë në treg, sepse Partizani i ka prishur kontratën, pas kërkesës së futbollistit.
Që sot Fili dhe menaxheri i tij Elton Marini kanë nisur bisedimet intensive me disa klube në Superiore dhe synimi është mbyllja e bisedimeve deri nesër.