Nëse mendoni se i dini të gjitha mbi Zlatan Ibrahimovic, gaboheni rëndë! Sulmuesi suedez ka mjaftueshëm bëma të treguara, por edhe shumë të tjera që nuk janë zbuluar ende. Në shtator ky futbollist që riktheu Milanin në “Champions League” mbush 40 vjeç. E për të festuar datëlindjen në mënyrën më të mirë, Ibrahimovic nuk do të jetë vetëm në fushën e blertë, por edhe në kopertinën e librit të jetës së tij. “Jua kam treguar të kaluarën, por zbuloj gjithçka tjetër në këtë libër”, tha Ibrahimovic duke paralajmëruar për një sërë historish të tjera që nuk janë mësuar më herët.
“Nëse ju pëlqente Ibra nga Sanremo, do ta gjeni këtu. Ka momente në jetë dhe sport që nuk i kam zbuluar më parë. Në moshën 40 vjeç, unë dua t’i zbuloj botës veten time më të thellë, vlerat e mia dhe rregullat e rrepta të jetës, momentet që më bënë lojtarin më të mirë në botë “, thotë suedezi që vazhdon:
“Por unë gjithashtu them detaje të panjohura nga karriera ime. Për shembull, një marrëveshje me një klub përfundoi ditën që nënshkrova kontratën. Nëse nuk do të kishte ndodhur, unë nuk do të isha në Milano sot”, përfundon Ibrahimovic duke nxitur më tepër kureshtjen e tifozëve. /Sport Ekspres/