Thomas Strakosha ka luajtur si titullar edhe në Europa League duke ulur në stol Pepe Reinën. Portieri shqiptar ka marrë besimin e trajnerit Sarri dhe gjithë tifozëve pas statistikave të dobëta të Reinës. Në mbrëmjen e djeshme Lacio do të humbiste në shifrat 2-1 pas dy golave të Toni Martinez. Por asnjë peshë faji nuk kishte për gardianin shqiptar pasi në të dyja rastet, goditjet e sulmuesit 24-vjeçar ishin të kalibruara në perfeksion pa lënë shans për ndërhyrje.
Megjithatë Strakosha arriti që të ndalte tripletën e Martinez që në minutën e 58 lëshoi edhe një predhë me të majtën, por portieri i Lacios ishte i vëmendshëm për të fluturuar. Në këtë mënyrë Lacio mbetet ende në lojë për të përmbysur gjithçka në Itali dhe për të kaluar më tej në “Europa League”. /Sport Ekspres/