Një kampionat i çmendur! Në ditën e sotme është zhvilluar java e parafundit e Superiores që ka bërë akoma më të komplikuara fatet e këtij sezoni. Tirana dhe Vllaznia, klasikja e kësaj jave ka përfunduar në shifrat 0-0, ndërsa Partizani ka fituar ndaj Kukësit në shifrat 0-1. Në krahun tjetër Teuta fitoi me rezultatin e pastër 0-3 ndaj Erzenit, ndërsa Egnatia nuk gaboi me Dinamon, 0-1. Vërtet interesante është se Skënderbeu barazoi në minutën e fundit ndaj Lacit, 1-1.
Nëse Laçi do të kishte fituar dhe do të kishte mbajtur avantazhin, atëherë diferenca mes Lacit që mbante vendin e Play Out dhe Tiranës, vendit të katër që të dërgon në Final Four, do të ishte vetëm dy pikë. Por me barazimin në fund të Skënderbeut, Laçi shkon zyrtarisht në Play Out. Më poshtë ndiqni intervistat e trajnerëve për emisionin “Skaner Superiore” në “MCN TV”.
Mehmeti (Dinamo): “Kaçorri nuk ka qenë në gjendje të mirë fizike në javët e fundit. Kjo është arsyeja përse ishte në stol, sepse ne me Kaçorrin kemi ardhur deri këtu. Lojtarët bëjnë gabime amatoreske, sepse duan të shkojnë menjëherë te fitorja. Nuk jam marrë ndonjëherë me arbitrat, por te goli duhet të rishikohej në VAR për një ndërhyrje te Mihaj. Por edhe lojtarët kanë bërë gabimet e tyre. Të vjen keq kur ti dominon dhe nuk je i qetë ta çosh topin në rrjetë. Edhe me Vllazninë, pësuam një gol të vdekur. Edhe sot e gatuam vetë golin që pësuam. Katërshja do të ishte një objektiv shumë i madh, sepse Dinamo ka vite që lëngon. E kemi një shans dhe do të bëjmë maksimumin me Teutën, por varet edhe nga ndeshjet e tjera. Përderisa jemi në garë deri tani, tregon që edhe Tirana, edhe Skënderbeu, edhe Teuta, nuk kanë bërë ndonjë gjë më shumë. Nuk kanë përse e meritojnë ata të shkojnë në ‘final four’ përpara nesh. Nëse kundërshtari e dominon lojën, unë ul kokën dhe i jap dorën. Por jo të humbim në këtë mënyrë, duke pësuar një gol të vdekur dhe duke humbur raste”.
Tetova (Egnatia): “Ndeshja ishte me dy tablo. Pjesa e parë ishte shumë e kontrolluar. Në pjesën e dytë kishim më shumë presion. Nuk e di pse. Nuk po e fillonim më lojën nga poshtë edhe për faktin se portiere nuk po ndihej mirë. Lojtarët nuk kërkojnë të sforcohen në maksimum në këto ndeshje, sepse na presin finalet. Në dy-tre ndeshje ekipi ka marrë gol në minutat 90+. Kjo është një eksperiencë për të mos pësuar më gola në fund. Të tre ekipet që janë tani dhe i 4-ti që do të vijë janë rivalë shumë të fortë”.
Brdariç (Vllaznia): “Sot dua të flas për lojtarët që janë në fushë. Ne luajtëm mirë. Na mungoi goli në pjesën e parë. Në pjesën e dytë ramë pak fizikisht. Kur bëmë ndryshimet, nuk prodhuam më tepër. Por ndryshuam sistemin dhe patëm më shumë siguri. Superiorja e Shqipërisë është shumë e fortë. Duhet të japësh maksimumin nëse do të fitosh ndeshjen. Shpresoj që gjysmëfinalja të duket më mirë. Vllaznia ka investuar këtë periudhë. Nuk duhet të harrojmë se fakti që jemi në ‘final four’ është diçka e veçantë. Në fund, na duhet edhe pak fat. Sot ishte e mundur të fitonim dhe të kishim një pozicion më të mirë në tabelë. Fatkeqësisht nuk mund të shkojmë më në vendin e parë. Nuk ka rëndësi nëse ndeshemi me Partizanin apo me Egnatian. Në gjysmëfinale shkon vetëm për fitore dhe ne do të bëjmë të pamundurën”.
Fagu (Tirana): “Në përgjithësi sot zhvilluam një ndeshje të mirë ndaj një kundërshtari të fortë/ I kishim mundësitë për të shënuar gol. Por presioni për rezultatin bëri të vetën. Ne do të japim maksimumin deri në javën e fundit. Përderisa matematika na e lejon, do të luftojmë për atë objektiv deri në ndeshjen e fundit. Nëse nuk do të arrijmë objektivin sezoni do të jetë i dështuar. Tirana luan gjithmonë për titull kampion, ose në këtë rast për të qenë në ‘final four’. Por kam besim dhe do të japim maksimumin deri në javën e fundit. Peng? Kam shumë. Por ndeshjen me Skënderbeun, që ishin me 10 vetë, duhet ta kishim mundur”./Halit Delibashi-Sport Ekspres/