Shqipëria U-21 u mund me rezultatin minimal 1-0 në ndeshje e vlefshme për kualifikueset e EURO 2025 ndaj Malit të Zi. Sfida e zhvilluar në stadiumin e Podgoricës u vendos nga goli i Marko Franeta vetëm në fundin e takimit.
Takimi i shtyrë në 21 nëntor të vitit të shkuar për shkak të kushteve atmosferike nisi në minutën e 27-të. Trajneri Alban Bushi ishte i kushtëzuar për të bërë katër zëvendësime që në nisje dhe në fushë u aktivizuan Smajli, Preka, Pecani dhe Ismaili.
Pavarësisht humbjes Kombëtarja U-21 zhvilloi një ndeshje të mirë dhe shpërdëroi disa raste të mira shënimi.
Kapiteni Pajaziti pati mundësinë më të mirë për të gjetur rrugën e rrjetës në pjesën e parë, ndërsa në fraksionin e dytë shpërdoruan edhe Shpendi dhe Nikaj.
Në fundin e ndeshjes, vendasit, përmes një kundërsulmi të shpejtë arritën që të shënonin golin e vetëm të sfidës me anë të mbrojtësit Franeta.
Pas kësaj humbjeje, kuqezinjtë mbetet në vendin e katërt me 10 pikë, por me dy ndeshje më tepër se rivalët. Shqipëria U-21 do të luajë edhe një ndeshje miqësore me Lihtenshtejnin më datë 11 qershor në orën 19:00, në stadiumin “Niko Dovana”.