E ardhmja e Vinicius Junior duket se është vendosur përfundimisht. Pas javësh spekulimesh për një largim të mundshëm nga Real Madridi, raportimet e fundit bëjnë të ditur se sulmuesi brazilian do të vazhdojë të jetë pjesë e klubit madrilen edhe pas mbylljes së merkatos së verës.
Sipas burimeve të afërta me klubin, drejtuesit e Realit nuk kanë asnjë plan për të shitur një nga yjet më të rëndësishëm të skuadrës. Përkundrazi, synimi i tyre është të finalizojnë sa më shpejt rinovimin e kontratës së Viniciusit me një marrëveshje afatgjatë, duke i dhënë fund çdo dyshimi mbi të ardhmen e tij.
Interesim serioz për brazilianin kishte shfaqur Arsenali, i cili monitoroi nga afër situatën dhe shpresonte të përfitonte në rast se negociatat mes lojtarit dhe Realit dështonin. Megjithatë, “Topçinjtë” nuk morën asnjë sinjal se klubi spanjoll ishte i gatshëm të diskutonte shitjen e tij.
Një rol të rëndësishëm në këtë vendim ka edhe trajneri Jose Mourinho, i cili e konsideron Viniciusin një nga shtyllat kryesore të projektit të tij të ri te Real Madridi. Portugezi dëshiron ta ndërtojë repartin ofensiv rreth brazilianit dhe nuk e sheh të mundur largimin e tij këtë verë.
Tashmë pritet vetëm finalizimi i marrëveshjes së re mes palëve, ndërsa gjithçka tregon se Vinicius Junior do të vazhdojë të jetë një nga figurat kryesore të “Los Blancos” edhe në vitet e ardhshme. /Sport Ekspres/