Etrit Berisha po vuan së tepërmi dhe me siguri po kalon momentin më të keq të karrierës. Portieri shqiptar e shprehu hapur pakënaqësinë e tij për minutat e pakta që ka pasur te Torino. Madje situata arriti deri aty sa të nisi konfliktin me trajnerin Juric në stërvitje. Pas kësaj përplasje, tekniku vendosi që të mos e thërriste më Berishën për ndeshjet e Torinos. Klubi kërkoi shitjen e portierit të Shqipërisë, që nga ana tjetër nuk dëshironte që të hiqte dorë nga pagesa e tij prej 800 mijë eurosh në sezon.
Torino dështoi që të gjente një skuadër të re për Berishën në merkaton e janarit. Tashmë klubi italian do të provojë që të djeg karrierën e shqiptarit që mund të kalojë 6 muaj pa luajtur në futbollin profesionist. Për më tepër Juric ka kërkuar që Berisha të mos stërvitet me pjesën tjetër të grupit, por veçmas. Pritja deri në merkaton e verës është shumë për lojtarin e Kombëtares dhe për më tepër që nuk do të ketë ekipe të tjera të gatshme për ta transferuar nëse nuk ndryshon situata te Torino. /Sport Ekspres/